Տնօրենը հերքում է. «Դժվար ապրուստ» սերիալի մասին շարադրություն չի հանձնարարվել

Երեկ լրատվամիջոցներում տարածվել էր մի տեղեկություն, ըստ որի՝ մի քանի օր առաջ Երևանի թիվ 155 դպրոցում ուսուցիչները հանձնարարել են աշակերտներին «Դժվար ապրուստ» Հ/Ս-ի դրական և բացասական կերպարների վերլուծությամբ շարադրություն գրել:

Lurer.com-ի հետ զրույցում դպրոցի տնօրեն Լուսինե Դանիելյանը հերքեց տարածված լուրերը.

«Հորդորում եմ նման անհիմն հայտարարություններ չանել: Ես վստահ կարող եմ ասել՝ ոչ մի դպրոցում նման շարադրություն չէր հանձնարարվի: Ի վերջո, մոռանում ենք, որ ուսուցիչն ունի բարձր հեղինակություն, և կարծում եմ՝ հայ ժողովուրդն այն կարգավիճակում չէ, որ մեր լավ գործերը թողնենք և անցնենք անգամ սերիալներին: Մենք ինքներս ենք դաստիարակում երեխաներին: Հասարակությունն իսկապես փչանում է սերիալներով: Այդ լուրը տարածող օգտատերի կողմից մի քայլ է, որ մեր դպրոցների հեղինակությունն արատավորի, հայ ժողովրդի կրթական օջախների մասին վատը խոսի: Նման բովանդակության շարադրություն չի տրվել, դպրոցը ողջ ուսումնական գործընթացում ունի ուսումնադաստիարակչական աշխատանքային պլան, որին մեծ տեղ է տրվում, ուր մնաց ուսուցիչը նման ճղճիմ բովանդակության շարադրություններ հանձնարարի»: