ВТБ-ում քցոցի՞ է

ՎՏԲ բանկի վարկային մասնագետ Արփինե Բաբայանը Lurer.com-ի թղթակցի հետ զրույցում տեղեկացրեց բանկի ներսում կատարված անարդարության մասին, որի զոհը դարձել է հենց ինքը: Նրա փոխանցմամբ՝ բանկի ներսում վարկային մասնագետին, այսինքն՝ իրեն աշխատանքային տեղ են հատկացրել սպասարկման սրահում, այնինչ վարկային մասնագետը պետք է աշխատեր ոսկերչի սենյակում: Բարձիթողի վիճակի արդյունքում ոսկերիչը բանկից որոշակի չափով ոսկի է գողացել: 

«Ես ՎՏԲ բանկի աշխատող եմ, այդ դեպքը կատարվել է ինձ հետ: Ըստ ՎՏԲ-ի կարգի՝ պիտի վարկային մասնագետը նստի ոսկերչի մոտ, որպեսզի ոսկին ձևակերպելու ընթացքում տոպրակը փակվելուց ներկա լինեմ, քանակը հաշվեմ: Բայց ես առանձին եմ նստում, այդ ընթացքում ոսկերիչն իր սև գործն անում է, այնուհետև ռեվիզիան գալիս, արձանագրում է, որ տոպրակի մեջ ոսկիները պակասում են,-ասաց Արփինե Բաբայանը և հավելեց,-Ես տեղյակ չեմ, ես հեռու եմ, մենք առանձին ենք նստած եղել, արդյունքում ինձ զրկում են աշխատավարձից: Տարածքային կառավարման տնօրենին ասել եմ՝ ես ի՞նչ մեղք ունեմ, դուք ինձ նստեցրել եք սպասարկման սրահում, ինձ պատասխանում է՝ «Ժամանակին պահանջեիր, որ հիմա այսպիսի բան չլիներ»: Բայց ըստ կարգի՝ ինձ պետք է մոտ տարածքում նստեցնեին: Ես, հիմքեր ունենալով, հայտարարում եմ տվյալ հանցագործության մասին»:

Հարցին, թե իրականում ինչ քանակության ոսկու մասին է խոսքը, վերջինս խուսափեց պատասխանել. «Ես այդ տվյալները հրապարակելու իրավունք չունեմ: Ես եռամսյակային բոնուս պետք է ստանայի, ինձ չեն վճարում, ասում են՝ ինձ կարգապահական տույժի ենթարկեցին: Տույժի են ենթարկել նաև տնօրենին»:

Ըստ տուժողի՝ ոսկերիչն այդտեղ երեքամսյա ժամկետով է աշխատել ու ինքն այլևս տեղյակ չէ ոսկերչից, միայն այն գիտի, որ նրա գնալուց հետո է բացահայտվել կատարվածը: «Ես արդեն աշխատանքից ազատվելու մասին դիմում եմ գրել և տնօրինությանը տեղեկացրել եմ, որ այս ամեն ինչի մասին հայտնելու և տարածելու եմ լրատվամիջոցներում»: