Հանդիպման նպատակը՝ սփյուռքի հետ տարվող աշխատանքի փորձի փոխանակում

Դեկտեմբերի 28-ին ՀՀ սփյուռքի նախարար Հրանուշ Հակոբյանն ընդունեց Ալժիրի Հանրապետության նախագահի հատուկ հարցերով խորհրդական, անվտանգության ոլորտի և անդրազգային ահաբեկչության դեմ պայքարի խնդիրները համակարգող Մուհամեդ Կամել Ռեզագ Բառայի ղեկավարած պատվիրակությանը:

Պատվիրակության ղեկավարը տեղեկացրեց, որ հանդիպման նպատակը սփյուռքի հետ տարվող աշխատանքի փորձի փոխանակումն էր ու խորհրդատվությունը:

ՀՀ սփյուռքի նախարար Հրանուշ Հակոբյանը նշեց, որ արդեն 4 տարի Հայաստանի Հանրապետությունը համակարգային մոտեցում է ցուցաբերում Հայաստան-Սփյուռք գործակցության զարգացմանը, համակարգում է Սփյուռքի հետ տարվող աշխատանքները: Հ. Հակոբյանը հանգամանորեն ներկայացրեց նախարարության գործունեության 4 տարիների աշխատանքի հիմնական ռազմավարական ուղղությունները, որոնք են՝ ազգային ներուժի համախմբումը, հայապահպանությունը Սփյուռքում և հայրենադարձության խթանումը: ՀՀ սփյուռքի նախարարությունը աշխատում է «Ճանաչել, վստահել, գործակցել» բանաձևով 100 երկրների ավելի քան 30.000 կազմակերպությունների, շուրջ 18 համահայկական կառույցների, 3 ավանդական կուսակցությունների, հոգևոր կառույցների հետ: Նախարար Հ. Հակոբյանը ներկայացրեց այն բոլոր ծրագրերն ու նախաձեռնությունները, որոնց շնորհիվ իրականություն են դառնում Հայրենիք-Սփյուռք գործակցության հայեցակարգային դրույթները:

Ալժիրի պատվիրակության ղեկավար Մուհամեդ Կամել Ռեզագ Բառան նշեց, որ բարձր է գնահատում Հայաստան-Սփյուռք գործակցության բարձր մակարդակը: Եվ չնայած հայկական Սփյուռքը առավել վաղ է կազմավորվել՝ Մուհամեդ Կամել Ռեզագ Բառան նմանություններ գտավ ալժիրյան սփյուռքի հետ:

Հանդիպման ընթացքում կողմերը մտքեր փոխանակեցին ՀՀ սփյուռքի նախարարության՝ հայ համայնքների հետ տարվող աշխատանքային մեթոդների, հայկական ազգանունների պահպանության, հայապահպանության, երկքաղաքացիության ինստիտուտի ներդրման ու դրանց կարևորության մասին:

Հանդիպման ավարտին կողմերը պատրաստակամություն հայտնեցին երկու երկրների սփյուռքի հետ տարվող աշխատանքներում համագործակցության, փորձի փոխանակման, պարբերաբար խորհրդակցություններ կազմակերպելու վերաբերյալ: