Գոհար Գասպարյան. «2013թ.-ը հագեցած է լինելու եվրատեսիլներով՝ երգի, պարային և մանկական երգի»

Հայաստանի Հանրային հեռուստաընկերությունը ուրախ է հայտնել, որ 2013թ.-ը հագեցած է լինելու Եվրատեսիլներով՝ երգի, պարային և մանկական երգի:

Հունիսի 14-ին Լեհաստանի Գդանսկ քաղաքում տեղի կունենա «Պատանի պարողների Եվրատեսիլ 2013» մրցույթը, որին առաջին անգամ կներկայանա Հայաստանը: Մրցույթին կարող են մասնակցել 16-21 տարեկան շնորհալի պարողներ: Հայաստանյան ազգային ընտրությանը մասնակցելու համար հունվարի սկզբին կհայտարարվի մրցույթ, որի մանրամասները տեղ կգտնեն Առաջին ալիքի www.1tv.am պաշտոնական կայքում:

Մայիսի 14,16,18-ին Շվեդիայի Մալմո քաղաքում կայանալիք Եվրատեսիլ 2013 երգի մրցույթի Հայաստանի ներկայացուցիչը և երգը կընտրվեն ներքին ընտրությամբ:

Ներքին ընտրությունը կկատարվի Հանրային հեռուստաընկերության հատուկ հանձնաժողովի կողմից, որի կազմում կընդգրկվեն ժամանակակից հայրենական երգարվեստը ներկայացնող մասնագետներ: Հայաստանյան մասնակցության մասին բոլոր մանրամասները հայտնի կդառնան մինչև 2013թ.-ի մարտի 10-ը:

Մանկական Եվրատեսիլ 2013-ը հյունընկալող երկրի անունը դեռ քննարկման փուլում է: