Ի՞նչի մասին են երազում Արեւիկ եւ Անուշիկ Ալավերդյանները

Անուշիկ եւ Արեւիկ Ալավերդյանները Նոր տարին միասին դիմավորելու են տանը, ներկայում իրենց մայրիկի ու տատիկի հետ նախապատրաստում են ամանորյա ուտեստները եւ հավատում, որ տարեմուտի գիշերը պահած երազանքներն ի կատար են ածվելու: BRAVO.am-ը հյուրընկալվել է Ալավերդյան քույրերի տանը, լուսանկարել նրանց տոնածառը զարդարելիս, ֆոտոշարքում կգտնեք նաեւ Շելբի շնիկին: Երգչուհիները պատմել են իրենց հաջողությունների, ակնկալիքների ու մանկական հիշողությունների մասին:

Անուշիկ. Մեր տոնածառը միշտ մայրս ու Արեւիկն են զարդարում: Մյուս տարի, երբ Արեւիկը Ֆրանսիայում կլինի, ստիպված կլինեմ ես զարդարել:

Արեւիկ. Սիրում եմ զարդարման ընթացքը: Այս անգամ տոնածառից փոքրիկ Էյֆելյան աշտարակ եմ կախել' ֆրանսիական շունչ հաղորդելու համար: Ինչպես շատ ընտանիքներում, դեկտեմբերի 31-ին մենք էլ արագ-արագ սեղանը գցում ենք, որ ուղիղ կեսգիշերին շամպայնը բացենք ու նստենք սեղանի շուրջ: Նոր տարին բոլորս միասին ենք դիմավորելու. ամուսինս Ֆրանսիայից կգա, կմիանան շատ մտերիմ մարդիկ եւ տանը կնշենք այս ընտանեկան տոնը:

Նոր տարվա սիրելի ուտեստները

Արեւիկ. Սիրում եմ բլինչիկ, պասուց դոլմա, նաեւ սացիվի: Տատիկս թբիլիսեցի է, իր բաղադրատոմսը մայրիկիս է սովորեցրել, նա էլ շատ համեղ պատրաստում է: Բայց այդ օրերին ես ամենից շատ ուզում եմ տապակած կարտոֆիլ ուտել:):

Անուշիկ. Եթե որեւէ տեղ հյուր եմ գնում, անպայման բլինչիկ եմ ուտում, որը երեւի թե բոլորի մոտ համեղ է ստացվում: Մսակեր եմ, նաեւ շատ եմ սիրում ավանդական խոզի բուդը: Իսկ մեր տանը միայն աղցաններն եմ պատրաստում:

Երազանքների Նոր տարին

Արեւիկ. Նախորդ Ամանորը դիմավորել եմ Ֆրանսիայում' ամուսնուս ընտանիքի հետ: Այդ ժամանակ նշանված էինք, գնացել էի ծանոթանալու փարիզյան կյանքին: Այնտեղ մեծ շուքով նշում են դեկտեմբերի 24-ի գիշերը' «Merry Christmas»-ը, որը մեզ համար ընդամենը նախապատրաստական օր է: Ինձ համար անսովոր, բայց շատ ուրախ օր էր, ամուսինս էլ Ձմեռ պապիկն էր: Իսկ Փարիզի ամանորյա ձեւավորումն ուղղակի հրաշք է, մեր Հանրապետության հրապարակի զարդարանքներն ինչ-որ չափով նման են Շանզ-Էլիզեի ձեւավորմանը, չնայած' Փարիզում աչքովս թռչող պեգասներ չեն ընկել:):

Հայկական Նոր տարվա վատ կողմերից մեկն այն է, որ չես հասցնում տոնից հաճույք ստանալ. անընդհատ պետք է հյուրերին դիմավորես ու ճանապարհես, հյուր գնաս, նույնիսկ այդ օրերին բարեկամներիդ հետ չես կարողանում լիարժեք շփվել: Այս տարի հայրական տանս անցկացրած վերջին Նոր տարին կլինի, բայց հուսով եմ' հետագայում կվերադառնամ ու նորից այստեղ կնշեմ:

Անուշիկ. Կցանկանայի Ամանորը նշել տաք որեւէ երկրում' լողավազանում կամ ծովափին: Ամեն ինչ դեռ ռջեւում է, հաստատ այդպիսի Ամանոր էլ կունենամ, բայց ամեն տարի տաք երկրում դիմավորելը հետաքրքիր չի լինի: Ավելի գերադասելի է հարազատ տանը լինել եւ ձմեռ ու ձյուն լինի:

Հիշողություններ

Արեւիկ. Մանկական շատ հիշողություններ ունենք: Երբ փոքր էինք, Ձմեռ պապիկին շատ էինք սպասում: Հանկարծ գիշերը մեր դուռը թակում էին, հայրս էլ ասում էր' Ձմեռ պապիկն արդեն երկրորդ հարկ բարձրացավ: Շատ խաղալիքներ էինք ստանում, իսկ հյուրերը մրգեր ու կոնֆետներ էին բերում, ասում էին' Ձմեռ պապիկն է ուղարկել:

Անուշիկ. Մի անգամ չեմ քնել եւ մինչեւ կեսգիշեր սպասել եմ, նստել դռան մոտ, որ տեսնեմ' երբ է գալու ու գնա, բայց այդպես էլ չտեսա:): Հանդեսների ժամանակ էլ Ձյունանուշիկի կերպարում եմ եղել, նաեւ անցյալ տարի անակնկալ արեցի ու կրկին Ձյունանուշիկ դարձա:

Նվերներ, նվերներ, նվերներ…

Արեւիկ. Ես Ձմեռ պապիկին նամակ գրեցի, տվեցի ամուսնուս եւ հիմա սպասում եմ:): Հստակ ասել եմ' ինչ եմ ուզում: Ֆրանսիայից շատ-շատ նվերներ է բերելու ոչ միայն ինձ, այլեւ ընտանիքիս անդամների համար: Ես էլ «Ձմեռ պապիկիս» համար նվեր ունեմ, բայց այդքան շռայլ չեմ, ինչպես ինքը: Հայրս էլ տարեվերջին տան համար խոշոր գնում է անում, արդեն ավանդույթ է դարձել:

Անուշիկ. Հաճախ Արեւիկը համացանցում հետաքրքիր ինչ-որ զգեստ կամ ուրիշ բան է տեսնում, ինձ հարցնում է' հավանում եմ, թե' ոչ, մի քանի րոպե հետո գալիս ասում է' գիտես ինչ է եղել… Ես արդեն գիտեմ, որ Հայկոն դա արդեն գնել է Արեւիկի համար:

Ի՞նչ հագնել տարեմուտի գիշերը

Արեւիկ. Վաղուց որոշել եմ' ինչ եմ հագնելու, ինչ աքսեսուարների հետ եմ համադրելու: Օրեր առաջ նորաձեւության փորձագետ Էվելինա Խրոմչենկոյի խորհուրդներն էի կարդում, որին համարում եմ մոդայի էտալոն, նա խորհուրդ էր տալիս, թե ինչ կարելի է կրել Նոր տարվա գիշերը: Հաճելիորեն զարմացա, որ նշել էր այն հագուստը, գույնը, դետալները, որոնք ես նախապես ընտրել էի: Համադրելու եմ սեւն ու ոսկեգույնը:

Անուշիկ. Իսկ ես նույնիսկ չգիտեմ' ինչ եմ հագնելու: Դերձակս վերջին օրով մի զգեստ կկարի: Հաճախ չեմ կողմնորշվում' ինչ կարելի է հագնել, պատահել է, որ համերգից մեկ օր առաջ կտորը տվել եմ իմ սիրելի դերձակին, առավոտյան վերցրել եմ ու հագել:

2012 թվականի ամենամեծ ձեռքբերումը

Անուշիկ. Վերջապես կազմավորվեց իմ բենդը, մաղթում եմ, որ բոլոր երգիչներն ունենան ու աշխատեն լավ երաժիշտների հետ: Ինձ համար իսկապես ձեռքբերում էր. որպես երգչուհի' մի քանի քայլ առաջ գնացի ու հասկացա' ինչ հաճելի է աշխատել կենդանի նվագախմբի հետ: Տարվա ընթացքում ակումբներում բազմաթիվ համերգներ ենք ունեցել: Նոր տարվա գիշերը չենք աշխատի, բայց հունվարի 1-ին Ծաղկաձորում ելույթ կունենանք:

Արեւիկ. Իհարկե, կարեւոր առաջին իրադարձությունն ամուսնությունս էր: Ընկերուհիներիս հետ շատ լավ օրեր եմ ունեցել, հուսամ' հաջորդ տարին էլ նույնքան դրական եւ ուրախ կանցնի:

Ակնկալիքներ, երազանքներ…

Արեւիկ. Ինձ համար 2013-ը սպասելիքներով լի տարի է. ամուսնուս հետ նպատակ ունենք ճանապարհորդել եվրոպական մի քանի քաղաքով' Լոնդոն, Վենետիկ…, իսկ 2014 թվականը դիմավորել Միացյալ Նահանգներում: Ուզում եմ' ընտանեկան ձեռքբերումներս շատ լինեն: Հունվարի 13-ից արդեն տեղափոխվելու եմ Ֆրանսիա, ուզում եմ իմ ամենամեծ հոբբին' նորաձեւությունը, մասնագիտություն դարձնել: Ամուսնուս հետ բիզնեսով չեմ զբաղվի, քանի որ հեռու եմ եւ չեմ հասկանում այդ ոլորտից:

Անուշիկ. Գալիք տարում իմ գործունեությունը երկու մասի է բաժանվելու' բենդի հետ համերգներ եւ անհատական աշխատանքներ: Հուսով եմ' վերջապես կնկարահանվի նոր տեսահոլովակս, որի երգը' «Սրտխփոցը», վաղուց պատրաստ է: Ես էլ կցանկանամ ճանապարհորդել, ամենակարեւորը' շատ-շատ եմ ուզում տեսնել Դիլիջանի Պարզ լիճը: Թող բոլորի երազանքներն իրականանան: