Կատարյալ Ամանորը Գլումովի համար

Հայկական շոու բիզնեսի «ամենակծող» հումորի տեր Եգոր Գլումովը (Գոռ Գրիգորյան),այսօր NEWS.am STYLE-ի հյուրն է։ Զրույցի ժամանակ շոումենը պատմեց Նոր տարվա իր բաղձալի երազանքի ու պարզ ընտանեկան երջանկության մասին։

Ձեր կարծիքով ի՞նչ է ամենագրավիչը կնոջ մեջ։

Տղամարդն ու կինը տարբեր բեւեռներ են, այդ պատճառով էլ ցանկացած կին, բնականորեն, գրավիչ է տղամարդու համար։ Իսկ կատարյալ կինը պետք է լինի գեղեցիկ, խելացի, լավ տնտեսուհի։ Ճիշտ է, այս բնութագիրը վերաբերում է միայն կնոջ ընտրությանը։ Իսկ եթե ընտրում եք աշխատակցուհի, գեղեցկուհի եւ տնտեսուհի լինելը պարտադիր չէ։

Ի՞նչն է ամենագլխավորը հարաբերություններում։

Վստահությունը։ Առանց դրա հարաբերություններ չեն լինում։ Կան սիրող զույգեր, որ չեն վստահում միմյանց։ Նման հարաբերությունները դատապարտված են։

Ո՞րն է երջանիկ ընտանեկան կյանքի գաղտնիքը։

Յուրաքանչյուրն իր բանաձեւն ու գաղտնիքն ունի։ Իմն է՝ սիրել, հարգել, վստահել, ցավոտ տեղերին չդիպչել, պահարանում կմախք չփնտրել, հնարավորինս շատ երեխաներ եւ, որ տղամարդն աշխատի ու ապահովի ընտանիքը։ Ահա ասում ու հասկանում եմ, որ ես շատ երջանիկ մարդ եմ։ Ես չեմ կառուցում երջանիկ ընտանեկան կյանք, այն ինչ-որ մոգական ձեւով ինքն-իրեն է կառուցվում։

Կանանց մասին ամենալավ անեկդոտը։

Ես չեմ սիրում կանանց մասին անպարկեշտ անեկդոտներ, իսկ պարկեշտ ու ոչ տափակ անեկդոտներ քիչ են պատահում։ Այնպես որ կմեջբերեմ դերասանուհի Ֆաինա Ռանեւսկայայի իմ սիրելի արտահայտություններից մեկը. «Կես ունեն խնձորն ու հետույքը, իսկ ես ամբողջական եմ»։

Ձեր ամենաանհաջող ժամադրությունը կյանքում։

Մի անգամ իմ ապագա կնոջը ժամադրեցի նրա ինստիտուտի մոտ։ Ծաղկեփունջը ձեռքիս սպասեցի նրան 3-4 ժամ։ Կեսից կարմիր վարդերը, որը պետք է նրան նվիրեի, սկսեցին թոռոմել իմ զայրույթից։ Այդ դեպքից հետո ես որոշեցի այլեւս նրան չսպասել, այլ գնալ նրա հետեւից։ Իսկ վարդեր… ես հիմա էլ եմ վարդ նվիրում։ Եւ կարմիր, եւ սպիտակ, եւ ամեն տեսակ…

Ինչպե՞ս եք պատկերացնում կատարյալ Ամանորը։

Կատարյալ Նոր տարին ինձ համար եղել է իմ ընտանեկան կյանքի առաջին տարում. ընտանեկան մթնոլորտում։ Սակայն, ցավոք, այս տարի էլ այդ ցանկությունս չի իրականանա. ամանորյա գիշերը ես աշխատում եմ։

Ի՞նչ կխնդրեիք Ձմեռ պապից։

Թող երեխաներն այս տարի երբեք չհիվանդանան ու ընտանիքում ամեն ինչ կարգին լինի։ Իսկ մնացած ցանկությունների համար ես ինքս կվաստակեմ։