Պորտապարուհի Աննա Պիպոյան. «Ես ոչնչից չվախեցող աղջիկ եմ»

Ամերիկաբնակ հայազգի հայտնի պորտապարուհի Աննա Պիպոյանը, խոսելով ձմեռային տոների մասին, նշել է, որ դեկտեմբերի 31-ին պատրաստվում է ելույթ ունենալ Վաշինգտոնում Ռուսաստանի դեսպանատան ամանորյա միջոցառման ժամանակ.«Անհամբերությամբ եմ սպասում այդ օրվան»:

Նա BRAVO.am-ի հետ զրույցում ասել է, որ Սուրբ Ծնունդն էլ միշտ նշում է ընտանիքի հետ. «Նախ' դեկտեմբերի 25-ին. այլ տարբերակ չկա, սա հատուկ օր է: Բայց մենք հայ ենք ու պարտադիր նշում ենք նաեւ հունվարի 6-ին: Այդ օրն անպայման գնում եմ եկեղեցի. սա հին ու բարի ավանդույթ է, մենք էլ փորձում ենք այն պահել»:

Աննան արդեն գնել է նվերներ իր ընկերների, սիրելի մայրիկի ու մյուս հարազատների համար.«Ավելի շատ սիրում եմ նվերներ մատուցել, քան ստանալ: Շատ եմ սիրում այն զարմացած հայացքները, որ ունենում են մարդիկ, երբ նվեր են ստանում: Ցանկացած դրական էմոցիա ինձ ուրախություն է պարգեւում»:

 Պարուհու խոսքով' ժամանակին Ձմեռ պապն իրեն շատ է սիրել ու միշտ հետաքրքիր ու ոճային նվերներ է բերել.«Դեռ այն ժամանակ, երբ Հայաստանում էի բնակվում, հիշում եմ, թե ինչպես էր սիրելի հայրիկս հագնում Ձմեռ պապիկի շորեր: Իմ առաջին նվերը ծնողներիցս ստացած կարմիր շատ ոճային ժամացույցն էր, որը պահում եմ մինչ օրս: Այդ ժամանակ վեց տարեկան էի եւ դա շատ հատուկ նվեր էր ինձ համար: Ճիշտ է, այդ ժամանակ ժամերը որոշել չէի կարողանում, բայց շատ թիթիզ էի ու ամբողջ ժամանակ կրում էի այդ ժամացույցը»:

Ինչպես ամեն տարի, այս անգամ էլ Աննայենց ամանորյա սեղանի զարդ է հանդիսանալու դոլման. «Մայրիկս այս ուտեստը շատ համեղ է պատրաստում»:

Խոսելով 2012-ի իր ձեռքբերումների մասին' նա հետեւյալն է նշել. «Շատ զբաղված տարի էր ինձ համար: Տարբեր ոճերի պարային մի քանի շոու բեմադրեցի' սամբա, սալսա, ֆլամենկո, գնչուական պարեր, ստեպ: Մեծ ուշադրություն եմ դարձրել իմ խմբին: Տարվա հաջողություններից եմ համարում նաեւ այն, որ հրավեր ստացա Ռուսաստանի գեղասահքի ֆեդերացիայից պարային, հատկապես գնչուական, պորտապարի եւ ուզբեկական պարերի համարներ բեմադրել հայտնի գեղասահորդներ Ելենա Իլինիխի, Նիկիտա Կացալապովի, Իվան Բարիեւի եւ Ալյոնա Լեոնովայի համար. «նոն ստոպ» եռօրյա ծանր աշխատանք, բայց գոհացնող արդյունք: Այդ շոուն կցուցադրվի Սոչիի ձմեռային օլիմպիական խաղերի ժամանակ: Այնքան հպարտ եմ: Եվս մեկ ձեռքբերում է իմ ուսուցողական պարային DVD-ն է, որը կթողարկվի հունվարին: Շնորհակալ եմ 2012-ից այսքան հաջողությունների համար»:

Աննա Պիպոյանը տեղեկացրել է, որ նաեւ ֆիլմում է նկարահանվել: «Բարի գալուստ տուն»-ն էկրան կբարձրանա 2013-ի գարնանը. «Հիասթափված տնային տնտեսուհու դերում եմ, որը 3 երեխա ունի: Ինձ համար մեծ փորձություն էր, քանի որ ֆիլմում խաղալու փորձ ու կերպարի հետ ոչ մի առնչություն չունեի: Բայց ես ոչնչից չվախեցող աղջիկ եմ, գնում եմ մարտահրավերներին ընդառաջ, դրա համար էլ համաձայնեցի մասնակցել նկարահանումներին ու մեծ անհամբերությամբ սպասում եմ ֆիլմի պրեմիերային»:

Աննա Պիպոյանը 2013-ին նպատակ ունի ճանաչվել նաեւ Միացյալ Նահանգների սահմաններից դուրս: Իսկ Ձմեռ պապից ոչինչ չի խնդրելու, քանի որ ունի այն, ինչ իրեն պետք է' հիանալի ընտանիք, ընկերներ եւ իրեն ներշնչող աշխատանք:

«Շնորհավոր Ամանոր եւ Սուրբ Ծնունդ, սիրելի հայ ժողովուրդ: Նա, ով չունի Սուրբ Ծննդյան խորհուրդն իր սրտում, երբեք չի կարող գտնել այն տոնածառի տակ: Աստծո օրհնությամբ թող խաղաղությունը նվեր լինի բոլորիս համար գալիք տարում: Այդպես աշխարհը հաստատ ավելի լավը կդառնա: Եկեք 2013-ի ամեն օրը տոն դարձնենք»,-ասել է պարուհին: