Ճապոնիայի վարչապետը մտադիր է նոր ատոմակայաններ կառուցել

Ճապոնիայի նոր վարչապետ Սինձո Աբեն հայտարարել է, որ մտադիր է երկրում նոր ատոմակայաններ կառուցել՝ նշելով, որ դրանք ապահով են լինելու։ Այս մասին հայտնում է BBC-ն:

Նախկինում նոր վարչապետը հայտարարել էր աշխատանքը կանգնեցրած ատոմակայանների վերագործարկման մասին, սակայն նոր ատոմակայանների կառուցման մասին չէր հիշատակել:

«Նոր ատոմակայանները բոլորովին այլ մեխանիզմով են կառուցվելու, ոչ այնպես, ինչպես 40 տարի առաջ կառուցվել էր «Ֆուկուսիմա» ատոմակայանը»,– հայտարարել է Ճապոնիայի վարչապետը:

Ճապոնիայի նախկին կառավարությունը՝ վարչապետ Եհիկո Նոդայի գլխավորությամբ, 2011թ. «Ֆուկուսիմա»–յում տեղի ունեցած աղետից հետո հայտարարել էր մինչև 2040թ. ատոմակայաններից մեկընդմիշտ հրաժարվելու իր նախագծի մասին: Կյանքի կոչել այդ նախագիծը նրանց «խանգարեց» վերջերս Ճապոնիայում կայացած խորհրդարանական ընտրությունների ժամանակ կրած պարտությունը։