Ցանկանում եմ, որ նոր տարուն աղքատները ավելի քիչ լինեն. Լևոն Հայրապետյան

«Սոբեսեդնիկ» հրատարակչական տան տնօրենների խորհրդի նախագահ, բարերար Լևոն Հայրապետյանը շնորհավորել է հայ ժողովրդին Ամանորի կապակցությամբ: Շնորհավորանքում, մասնավորապես, ասված է.

«Նոր Տարին այն տոնն է, որը եղել և մնում է բարության և հույսի խորհրդանիշ: Միևնույն ժամանակ, մեծ ցավով պետք է նշեմ, որ մենք ավելի շատ չլուծված խնդիրներ ունենք, քան ձեռքբերումներ.այս օրերին ոչ բոլորի սեղաններն են հարուստ, ոչ բոլոր տներում երջանկություն և հաջողություններ կան:

Այդ առումով, ես մեզ բոլորիս ցանկանում եմ, որ նոր տարուն ազատվենք Հայաստանը քայքայող օլիգարխիայից և կոռուպցիայից: Ցանկության դեպքում մեր փոքրիկ հայրենիքում կարելի է կարգուկանոն հաստատել հաշված ամիսների ընթացքում:

Ցանկանում եմ, որ նոր տարուն աղքատները ավելի քիչ լինեն: Որպեսզի երեխաները ավելի շատ լինեն և երջանիկ լինեն: Որպեսզի աշխարհում մեր Հայրենիքին մեծ վստահությամբ և հարգանքով վերաբերվեն, և վերջապես բոլորը հասկանան, որ Արցախի ճանաչման համար մղվող պայքարը թելադրված է ոչ միայն մեր ազգային շահերի, այլ նաև արդարության պահանջով:

Ամենակարևորն, իմ կարծիքով, մեր ակունքներին վերադառնալն է: Դեռ 1500 տարի առաջ՝ 500-ականներին, արցախյան Վաչագան Բարեպաշտ թագավորի նախաձեռնությամբ ընդունվեց առաջին հայկական սահմանադրությունը: Դրա առաջին նախագիծն ուղարկվեց գյուղեր, որտեղ բնակիչները հայտնեցին իրենց կարծիքը, թագավորը հրավիրեց մեծ ազգային համագումար, ինչից հետո միայն հանրաքվե անցկացրեց սահմանադրության ընդունման հարցով: Համագումարը ղեկավարում էր շարքային զինվոր: Եվրոպայում նման մոտեցում ձևավորվեց միայն 1000 տարի անց:

Իմ կարծիքով, սա ակնհայտ վկայություն է այն բանի, որ, եթե մեր պետության բնականոն զարգացումը չընդհատվեր, ապա հենց մենք կլինեինք հայտնի որպես այն արժեքների առաջին կրողները, որոնք ժամանակակից աշխարհում համարվում են եվրոպական և որոնց մեզ այսօր խորհուրդ են տալիս հետևել:

Մեր ժողովրդի անցյալի համապատասխան ընկալումը հանդիսանում է մեր արժանապատիվ ապագայի գլխավոր բանալին:

Սիրելի համաերկրացիներ: Այս հրաշալի տոնին ցանկանում եմ, որ ձեր տները լի լինեն ներդաշնակությամբ: Թող հոգևոր հանգստությունն ուղեկցի ձեզ ոչ միայն այս տարի, այլև ողջ կյանքում:

Շնորհավոր Ամանոր»: