ԱԺ պատգամավոր Էդմոն Մարուքյանի՝ 2012-ի ամենակարևոր ձեռքբերումը

ՀՀ ԱԺ անկախ պատգամավոր Էդմոն Մարուքյանը, ամփոփելով 2012 թվականը, նշեց, որ իր կյանքում անցնող տարում մի քանի ձեռքբերումներ է ունեցել.

«2012 թվականին ծնվեց երկրորդ տղաս. դրանից կարևոր ձեռքբերում ինձ համար չկա: Հաջորդը երևի այն է, որ ընտրվել եմ ԱԺ պատգամավոր:

Կարող եմ ասել նաև ձեռքբերում է կոնկրետ ինձ համար՝ որպես արդեն ԱԺ պատգամավոր, խորհրդարանական ընտրություններից հետո տեղի ունեցած ԱԺ ակտիվ քաղաքական գործընթացները, որոնք չեմ կարող համեմատել չորրորդ գումարման ԱԺ-ի հետ»,- Lurer.com-ի հետ զրույցում ասաց Մարուքյանը:

Իսկ թե «ի՞նչ է ակնկալում արդեն երկու որդիների հայր և ԱԺ պատգամավոր դարձած Էդմոն Մարուքյանը 2013-ից» հարցին վերջինս պատասխանեց.

«2013-ից ակնկալում եմ, որ կլինի կայուն զարգացման տարի: Ժողովրդիս մաղթում եմ առողջություն, սեր՝ ընտանիքներում, և խաղաղություն»:

Պատգամավորի խոսքով 2012-ի բացթողումը, որն իր մտքում լավ է տպավորվել՝ Սևանից բաց թողնված ջուրն է.

«Շատ բաներ կարող եմ հիշել, բայց խորհրդարանական ակտիվ քննարկումները, Սևանից հավելյալ ջուր բաց թողնելու հետ կապված, շատ լավ եմ հիշում»,- ասաց վերջինս:

Ինչ վերաբերում է ձեռքբերումներին, պատգամավորը նշեց այն, որ իր կողմից արված հարկային փաթեթների հետ կապված առաջարկությունների մի մասն ընդունվել են և, համենայնդեպս, իր համար՝ որպես պատգամավոր, դա նույնպես ձեռքբերում է: