Մարդը, որ անգամ դիպլոմ չունի, ինչպե՞ս կարող է կրթել այլոց. «Հրապարակ»

ՀՀ վարչապետի կինը` Աննա Հակոբյանը, ֆեյսբուքյան իր էջում գրառում է կատարել՝ նշելով, որ «Կրթվելը նորաձեւ է» շարժման առաջին փուլն այսպիսով կարող են հաջողությամբ փակել եւ թեւակոխել երկրորդ փուլ։ Այսինքն, կրթարշավն ավարտվում է:

«Ուղիղ ինն ամիս առաջ մեկնարկել է «Կրթվելը նորաձեւ է» նախաձեռնությունը եւ վերածվել շարժման։ Այսօր կարող ենք արձանագրել, որ անընդհատ եւ շարունակաբար կրթվելու, նորովի կրթվելու, մտքի եւ հոգու հեղափոխության գաղափարներն ամբողջությամբ տարածված են մեր երկրում եւ մեծ աջակցություն են վայելում։ Սա լավ սկիզբ է։ Շատ լավ սկիզբ է։ Բայց միայն սկիզբն է։ «Կրթվելը նորաձեւ է» շարժման առաջին փուլն այսպիսով կարող ենք հաջողությամբ փակել եւ թեւակոխել երկրորդ փուլ։ Երկրորդ փուլն իմպլեմենտացիայի փուլն է։ Այսինքն` փաստացի կրթվելու, նոր գիտելիքներ ձեռք բերելու, ինքնակատարելագործվելու փուլը։ Այս փուլը հաջողված կլինի միայն մի դեպքում. երբ այս պահից սկսած՝ ինչ-որ նոր բան սովորելու գործողությունը համաճարակի նման տարածվի ողջ երկրով մեկ։ Խնդրում եմ յուրաքանչյուրին՝ այս համաճարակից չպաշտպանվել, կրթվելու բացիլ կրել իր մեջ եւ դրանով շրջապատին վարակել։ Ավելի քան 11 հազար մարդ ներկա եղավ այս շատ կարեւոր խոսակցությանը, ավելի քան 12 հազար մարդ միացել է շարժմանը։ Եթե յուրաքանչյուրը սեփական օրինակով վարակի 100-200 հոգու, ինքնակատարելագործվելու համաճարակն անխուսափելի կլինի: Իսկ եթե դուք ցանկանում եք նոր բան սովորել կամ ինքնակատարելագործվել, բայց չգիտեք՝ ինչ եւ ինչպես, հետեւեք «Իմ քայլը» հիմնադրամի հայտարարություններին։ Շարժման կենտրոնական կոմիտեի եւ հիմնադրամի ջանքերն ուղղված են այս հարցերի պատասխանները գտնելուն եւ ձեզ համար հնարավորություններ ստեղծելուն»,- գրել է Հակոբյանը՝ ազդարարելով, որ ինքը 2 տարով մեկնում է Չինաստան` փիլիսոփայություն ուսանելու։ 

Վալերի Բրյուսովի անվան լեզվահասարակագիտական համալսարանի նախկին պրոռեկտոր, երկարամյա դասախոս Ցոլակ Ակոպյանից «Հրապարակը» հետաքրքրվեց` ի՞նչ կարծիք ունի Աննա Հակոբյանի նախաձեռնած կրթարշավի մասին, որին ակտիվորեն մասնակցում էր նաեւ նրա ամուսինը` Նիկոլ Փաշինյանը: Հնարավո՞ր է վարչապետն ու իր կինը որոշել են «նոր փուլ թեւակոխել» եւ հանրությանը «կրթել» արդեն այլ մեթոդներով, թե՞ գուցե հասկացել են, որ այն, ինչ իրենք են անում, մեղմ ասած, հանրության մոտ ծաղր ու ծիծաղ է առաջացնում: Ակոպյանը մեզ հետ զրույցում անդրադառնալով թեմային, ասաց. «Այդ արշավն իրականում էժանագին շոու էր, հոգեւորսության նման մի բան` իրենց զրոյական վարկանիշը բարձրացնելու համար: Այն փիառ ակցիա էր, որը հաջողության չհասավ, հատկապես տեսնելով, թե ովքեր էին մասնակցում, ինչպես էին մասնակցում, մասնակիցների թիվն այս ամիսների ընթացքում եւ այլն, ցույց է տալիս մի բան, որ այդ ակցիան անիմաստ էր: Ակնհայտ է, որ այդ զույգն ուզում է քաղաքականից գնալ նաեւ քաղաքացիական դաշտ՝ ցույց տալով, որ իրենք նաեւ այդ դաշտում են, մեծ հաշվով, սա նախընտրական քարոզարշավի մի տարր էր նաեւ, որը, իմ կարծիքով, ոչ մի հաջողություն չունեցավ: Շատ վատ է, որ մեզանում կրթության մասին խոսում են մարդիկ, ովքեր շատ հեռու են կրթությունից, անգամ չունեն բարձրագույն կրթություն: Մարդը, որ անգամ դիպլոմ չունի, ինչպե՞ս կարող է կրթել այլոց: Բայց, ամեն դեպքում, ես այն կարծիքին եմ, որ նրանք կանգ չեն առնելու, ամեն դեպքում դեռ շարունակելու են որոշներին «կրթել»: Միլիոններ են վատնելու բյուջեից՝ իրենց չստացված կրթարշավի համար: Իրականում այդ արշավը բավականին մեծ ռեսուրսներ է ենթադրում, օրինակ` անվտանգության հարցերը եւ այլն: Մասնագիտական հմտություններից բացի, լսարան մտնող մարդը նախեւառաջ պետք է լինի բարոյական: Կրթության հետ գործ ունեցող մարդը պետք է օրինակ ծառայի ուրիշների համար: Որեւէ բանական մարդ, լսելով այդ «դասախոսների» ելույթները, կարդալով նրանց գրառումները, չի կարող լուրջ ընդունել նրանց: Ես հիշում եմ, որ անգամ այդ կրթարշավի ժամանակ ինչ-ինչ դասախոսներ էին գնացել, ուղղակի ցավում եմ նրանց համար: Շատերի հետ ճանապարհ եմ անցել, թեպետ շատերը պնդում են, որ ներկայացել են ստիպողաբար, սակայն դասախոսը երբեք չպետք է վախենա աշխատանքը կորցնելուց: Ո՞վ ասաց, որ իրենց երեխաներն ավելի լավն են, քանի մեր երեխաները: Մենք մեր սկզբունքների համար պայքարի ենք դուրս եկել, աշխատանք ենք կորցրել, մեր օրինակով պետք է բոլորը հասկանան, որ վախենալ պետք չէ, դասախոսի առաքելությունը նաեւ դա է: Չի կարող դասախոսը պատերի տակ խոսելով բավարարվել»: