Տեղեկություններ են ստացվում՝ Ադրբեջանում թուրքական/նատօյական խոշոր ռազմաբազա հիմնելու մտադրության մասին. քաղաքագետ

«Մի քանի աղբյուրներից և հետազոտական կենտրոններից տեղեկություններ են ստացվում Ադրբեջանում թուրքական/նատօյական խոշոր ռազմաբազա հիմնելու մտադրության մասին: Ռուս-ադրբեջանական հարաբերություններում առկա լարվածությունը արևմտյան ստրատեգների համար լավագույն պատրվակն է ռազմաբազան հենց ռուսական սահմանին տեղադրելու և ինչու չէ նաև Ռուսաստանի դեմ երկրորդ ճակատը բացելու համար»,-գրում է քաղաքագետ Գարիկ Քեռյանը։

Նա նշում է.

«Երկրորդ ճակատի բացման պլանը անընդհատ փորձում են իրականացնել արդեն երրորդ տարին է, բայց ապարդյուն: Սկզբում հույսը Վրաստանն էր, որոշ չափով Մոլդովան, դա տապալվեց, հիմա շատ լուրջ խաղադրույք է արվում Ադրբեջանի վրա: Ադրբեջանը սահմանակցում է հյուսիսկովկասյան մուսուլմանական հանրապետություններին, որտեղ շատ ուժեղ են անջատողական հակառուսական միտումները:

Եվ արդեն պարզ է, թե ներքաղաքական անկայունության ինչ հսկայական վտանգ կա ադրբեջանական սահմանից: Ես կանխատեսում եմ, որ ուկրաինական ճակատում բեկում մտցնելու համար Արևմուտքը կարող է կենտրոնացնել ուժերը այս գործողության իրականացման վրա:

Եվ հիմա, արդեն էլ ավելի հստակ է զգացվում, ինչպես նշեց մեծ հայասեր Զատուլինը, հարավկովկասյան անվտանգության ճարտարապետությունից ղարաբաղյան աղյուսը հանելու և ողջ համակարգը փլուզելու աղետաբեր հետևանքները: Եվ վերջում թող ՀՀ արևմտամետ հակառուս փորձանքագետներն ու եվրաքվեականները նորից փորձեն հասկանալ որտեղ է հայոց շահը և Արևմուտքը արդյոք հայկական շահը պաշտպանելու մտադրություն ունի, իր գլոբալ ծրագրերը իրականացնելիս: Իսկ ռուսական արտաքին քաղաքականությունը ղեկին կանգնածները երևի, թե խորը ընկճախտի մեջ են: Ինչպես կարելի է երկու հարյուր տարի անընդհատ սխալվել: Աներևակայելի կարճատեսություն»։