Խստորեն դատապարտում ենք Վեհափառի դեմ հարձակումները․ արգենտինական կազմակերպությունները՝ Փաշինյանին

Բաց նամակ
Հայաստանի Հանրապետութեան
վարչապետ Նիկոլ Փաշինեանին

Մեծայարգ´ պարոն վարչապետ,

Յանուն Արժանթինեան Հանրապետութեան Հայկական Հաստատութիւններուն (IARA), այսու կու գանք խստօրէն դատապարտելու Հայաստանի Հանրապետութեան կառավարութեան կողմէ Ծայրագոյն Պատրիարք և Կափողիկոս Ամենայն Հայոց Ն.Ս.Օ.Տ.Տ. Գարեգին Բ-ի դէմ ուղղուած անհիմն յարձակումներն ու մեղադրանքները։

Այս յարձակումը ուղղուած է ոչ միայն մէկ անձի, այլև Հայաստանեայց Առաքելական Եկեղեցւոյ դէմ որպէս ամբողջութիւն. անոր ղեկավարութիւնը հարուածելով՝ կը փորձէք տկարացնել անոր ամբողջ հոգեւոր, մշակութային և ազգային մարմինը՝ խորապէս վնասելով մեր հաւաքական ինքնութիւնը որպէս ժողովուրդ։

Սուրբ Առաքեալներու կողմէ հիմնուած Հայաստանեայց Առաքելական Եկեղեցին դարեր շարունակ եղած է հայ ժողովուրդի հոգեւոր, մշակութային և ազգային հոգին։

Այն եղած է և կը մնայ միասնութեան յենասիւն մը Հայաստանի, Արցախի և սփիւռքի հայերուն համար։ Անոր առաքելութիւնը երբեք քաղաքական չէ եղած. անոր գործունէութիւնը եղած է և կը շարունակէ ըլլալ ինքնութեան պահպանումը, ցեղասպա նութենէն մազապուրծ եղածներու ընտանիքներուն ուղեկցելը և հայ ժողովուրդի հոգեւոր և ազգային արժէքները պաշտպանել։

Պնդել որ Եկեղեցին վտանգ մը կը ներկայացնէ, կամ կը գործէ ժողովուրդի շահերուն դէմ, բացի անհիմն ըլլալէն, լուրջ ինստիտուցիոնալ սխալ մըն է։ Արցախի ժողովուրդի՝ իր հողին վրայ ապրելու իրաւունքի հաստատումը, պատմական արդարութեան պահանջքը և ազգային ինքնիշխանութեան պաշտպանութիւնը չի նշանակեր միջամտել կուսակցական քաղաքականության, այլ կը նշանակէ պահպանել այն արժէքները, որոնք մեզ հայ կը սահմանեն։

Կաթողիկոսը, որպէս աշխարհի աւելի քան եօթ միլիոն հայերու հոգեւոր առաջնորդ, ընտրուած է իր եկեղեցւոյ գործընկերներու և հայրենիքի և աշխարհի տարբեր համայնքներ ներկայացնող պատգամաւորներու կողմէ։ Անոր վարկաբեկելու որեւէ փորձ մեր ազգի պատմական շարունակականութեան դէմ յարձակում մը կը հանդիսանայ և մեր հաւաքական խղճի նկատմամբ խոր անյարգալիր վերաբերմունք մըն է։

Հայաստանի համար այս վճռորոշ պահուն, երբ առկայ են խիստ զգայուն աշխարհաքաղաքական, ընկերային և տնտեսական մարտահրաւէրներ, անընդունելի է պետական հնարաւորութիւնները և ոյժը ուղղել Եկեղեցւոյ հետ բախման, քաղաքացիներու՝ լրատուամիջոցներուն մէջ ազատ արտայայտուելու դէմ կամ ժողովրդավարութիւնն ու հանրապետական արժէքները խաթարող գործողութիւններու, երբ անհրաժեշտ են միասնութիւն, առաջնորդութիւն և պատասխանատուութիւն։

Մենք կոչ կ’ընենք Հայաստանի պետական իշխանութիւններուն, որպէսզի դադրեցնեն Եկեղեցիին և անոր բարձրագոյն իշխանութեան դէմ ուղղուած ամէն տեսակի հալածանքները կամ ճնշումները, և համատեղ աշխատին անոնց հետ՝
ինստիտուցիոնալ յարգանքով, երկիրը ամրապնդելու և վերականգնելու ժողովուրդի վստահութիւնը անոր հիմնարար հաստատութիւններու նկատմամբ։

Պուէնոս Այրէս, 30 Յուլիս 2025

Արժանթինեան Հանրապետութեան Հայկական Հաստատութիւններ (IARA)