2012-ի ամենից շատ «կողմ», «դեմ», «ձեռնպահ» քվեարկած և ամենից շատ բացակայած պատգամավորները

2012 թվականին հինգերորդ գումարման Ազգային ժողովի նիստերից ամենաշատը բացակայել է ԲՀԿ առաջնորդ, «Բարգավաճ Հայաստան» խորհրդարանական խմբակցության ղեկավար Գագիկ Ծառուկյանը: Վերջինս բացակայել է 86 անգամ:

Բացականերով երկրորդ հորիզոնականում է «Հայ ազգային կոնգրես» խորհրդարանական խմբակցության պատգամավոր Ստեփան Դեմիրճյանը՝ 79 բացակա, իսկ երրորդ տեղում է «Բարգավաճ Հայաստան» խորհրդարանական խմբակցության պատգամավոր Կարո Կարապետյանը՝ 66 բացակա: Այս մասին տեղեկանում ենք parliamentmonitoring.am կայքից:

Ըստ կայքի տվյալների՝ 2012-ին ԱԺ ամենաակտիվ պատգամավորն էր ՀՅԴ խմբակցության պատգամավոր Արծվիկ Մինասյանը, երկրորդ տեղում է ՀՀԿ խմբակցության պատգամավոր Խոսրով Հարությունյանը, իսկ երրորդ տեղում՝ անկախ պատգամավոր Էդմոն Մարուքյանը:

Ազգային ժողով ներկայացված նախագծերին ամենից շատ «կողմ» քվեարկել են ՀՀԿ-ականները: 85-ական անգամ քվեարկել են Էդուարդ Շարմազանովը, Սուքիաս Ավետիսյանը և Հայկ Բաբուխանյանը:

Բոլորովին այլ պատկեր է «դեմ» քվեարկածների պարագայում: Այս անգամ նախագծերին ամենից շատ «դեմ» են արտահայտվել «Հայ ազգային կոնգրես» խորհրդարանական խմբակցության պատգամավորները. Նիկոլ Փաշինյան՝ 42 անգամ, Լևոն Զուրաբյան՝ 34, իսկ  Լյուդմիլա Սարգսյան՝ 33 անգամ: 

Հինգերորդ գումարման Ազգային ժողովի նիստերին օրենքի նախագծերին «ձեռնպահ» են քվեարկել ՀՅԴ խմբակցության պատգամավոր Արծվիկ Մինասյանը՝ 42 անգամ, նույն խմբակցության ղեկավար Արմեն Ռուստամյանը՝ 42 անգամ և «Ժառանգություն» խմբակցության պատգամավոր Ալեքսանդր Արզումանյանը՝ 34 անգամ: