Բերլուսկոնին այլևս չի հավակնում վարչապետի պաշտոնին

Իտալիայի նախկին վարչապետ Սիլիվիո Բերլուսկոնին, ով ավելի վաղ պաշտոնապես առաջադրել էր իր թեկնածությունը կառավարության ղեկավարի պաշտոնում փետրվարին կայանալիք ընտրություններում, հայտարարել է, որ հաղթանակի դեպքում մտադիր չէ ղեկավարել կաբինետը, այլ կզբաղեցնի միայն էկոնոմիկայի նախարարի պաշտոնը: «Ավելի վաղ ես հայտարարել էի իմ հետնորդի անունը, դա Անջելիոն Ալֆանոն է: Ես վարչապետ արդեն եղել եմ: Եթե մենք հաղթենք, վարչապետ կլինի Ալֆանոն, իսկ ես կդառնամ էկոնոմիկայի նախարար»,- հայտարարել է քաղաքական գործիչը երկուշաբթի օրը իտալական Rtl 102.5 ռադիոկայանի ուղիղ եթերից: Բերլուսկոնիի հրապարակած որոշումը պայմանավորված է քաղաքական համաձայնագրով, որը նախորդ գիշեր ձեռք էր բերվել նախկին վարչապետի և «Հյուսիսի լիգա» կուսակցության առաջնորդ, իր կառավարությունում ՆԳՆ-ի նախկին ղեկավար Ռոբերտո Մարոնիի հետ հանդիպման արդյունքում:

Ավելի վաղ այս կուսակցության ղեկավարները բազմիցս հայտարարել են, որ պատրաստ են քաղաքական դաշինք կնքել Բերլուսկոնիի «Ազատության ժողովուրդ» կուսակցության հետ, սակայն այն պայմանով, որ քաղաքական գործիչը չի հավակնի նոր կաբինետի ղեկավարի պաշտոնին:

Արդյունքում կոմպրոմիսային համաձայնությունը ձեռք էր բերվել. Բերլուսկոնին հրաժարվել է Իտալիայի վարչապետ դառնալու հեռանկարից: Տեղական դիտորդները նշում են, որ քվեարկության արդյունքները զգալի ազդեցություն կունենան ուժերի դասավորվածության վրա Իտալիայի նոր խորհրդարանում: