Էպոսագետի համար «Լեքսուս» և «Ռենջ ռովեր» գնելը խնդիր չէ

«ՀԺ»-ն հարցրել է նախագահի թեկնածու էպոսագետ Վարդան Սեդրակյանին, թե որտեղից նրան 8 մլն ընտրագրավը, վերջինս պատասխանել է.

-Մյուսները, որ դրել են, ողորմություն հավաքելով են դրել՝ Րաֆֆին, Պարույրը: Հիշո՞ւմ եք, որ Րաֆֆին ասաց՝ ազգը պիտի հավաքի, ես էլ առաջարկեցի իմ օգնությունը, չընդունեց, Պարույր Հայրիկյանը նամակներ էր ուղարկել Հայաստանով մեկ: Հիմա աշխատել-չաշխատելը ի՞նչ է խանգարում:

-Բայց որտեղի՞ց ձեզ այն:

- Օրինակ, կան թեկնածուներ, որ աշխատում են ինչ-որ տեղ, իրենց աշխատավարձը թո՞ւյլ է տալիս այդ գրավը մուծել:

-Իհարկե՝ ոչ, Բագրատյանինը, թերևս կարող է թույլ տալ, քանի որ նրա դասախոսություններն արտերկրում շատ թանկ արժեն:

-Ես էլ իմ ամբողջ կյանքում և՛ Պարսկաստանում, և՛ Ռուսաստանում բազմաթիվ դասախոսություններ եմ ունեցել հայոց էպոսի և տվյալ ազգի էպոսի զուգահեռների մասին: Ինչո՞ւ վերցրեցիք, որ Բագրատյանի դասախոսությունները շատ ավելի արժեն, քան իմը:

-Կարելի՞ է իմանալ՝ ձեր մի դասախոսությունն ինչ արժի:

-Օ, դա շատ լուրջ գաղտնիք է: Կախված է երկրից, ֆինանսական հնարավորություններից և այլն: Այդ գումարն իմ անձնական խնայողություններն են և իմ ընկերների, իմ ուսանողական, դասընկերների, իմ առևտրի ընկերների: Ես հիմա չեմ աշխատում, բայց ժամանակին լավ բիզնես եմ ունեցել: Չինաստանից ապրանք եմ բերել, այստեղից ՌԴ եմ տարել:

-Ի՞նչ ապրանք:

-Կներեք, դուք ՀԺ-ի՞ց եք, թե՞ ԱԱԾ-ից: 

-Չեք ասում, լավ, իսկ ընտրարշավի գումարները... Դրա համար էլ են հսկայական գումարներ անհնաժեշտ:

-Դա ինձ համար հսկայական չէ: Ես նախատեսել էի մոտ 2 մլն դոլար ծախսել, բայց օրենքը թույլ չի տալիս այդքան, ստիպված պետք է 100 մլն դրամի մեջ տեղավորվեմ:

-Մի խոսքով, այդ առումով էլ խնդիր չունեք:

-Գիտեք ինչ, ես ձմռան վերջին իմ ընտանիքով հանգստանում էի Դուբայում, հետո մի օր քաղաքում պտտվում էինք, որոշեցինք մտնել ավտոյի սալոններ, և ես «Լեքսուս» գնեցի կնոջս նվեր, որը մոտ 100 հազարանոց մեքենա է: Հետո տեսա, որ մեր տղան շատ է նեղվում, նրա համար «Ռենջ ռովեր սպորտ» գնեցի…: