Րաֆֆի Հովհաննիսյանը՝ Հայրիկյանի և Բագրատյանի մասին

Սա լինելու է պայքար երկու Հայաստանների միջև՝ գործող դե ֆակտո Հայաստանի և ապագա դե յուրե Հայաստանի»: Այսօր լրագրողների հետ հանդիպմանը նման տեսակետ հայտնեց Րաֆֆի Հովհաննիսյանը և հավելեց. «Փետրվարի 18-ին լինելու է երկու «Հայաստանների» պայքար, լինելու է Սերժի և Րաֆֆիի Հայաստանների պայքարը»:

Բանախոսը նշեց, որ հարգում է  ՀՀ նախագահի բոլոր թեկնածուներին, հատկապես՝ Հայրիկյանին և Բագրատյանին: Նրանք ՀՀ պետականության ակունքներում են կանգնել: Ուստի, Րաֆֆի Հովհաննիսյանի համոզմամբ, նրանք արժանի մրցակիցներ են թե՛ ՀՀ նախագահի, թե՛ իր համար: Բացի դրանից, անհրաժեշտ է, որ յուրաքանչյուր քաղաքացի ընտրություն կատարի իր որոշմամբ, որովհետև կեղծ են թեզերը, թե նախագահական ընտրությունների ելքը կանխորոշված է:

Անդրադառնալով իր հնարավորություններին՝ վերջինս նշեց. «Իմ համեստությունը և ինքնավստահությունն ինձ թույլ չեն տալիս պնդելու, որ մենք կհաղթենք առաջին փուլում, դրա համար, կարծում եմ, մենք կունենանք երկրորդ փուլ»:

«Ով տանը մնա այդ օրը, կամա թե ակամա, ուզի թե չուզի, մասնակցում է քաղաքական հնազանդության հաղթարշավին: Չմասնակցելով ընտրություններին՝ ապահովում է այս իշխանության վերարտադրումը, որը պետք է բացառել: Այդ իսկ պատճառով կոչ եմ անում՝ քաղաքացիական հասարակությունը և քաղաքական կուսակցություններն անպայման մասնակցեն ընտրություններին, որովհետև սա լինելու է պատմական և ապագայամետ ընտրություն»,-ասաց նախագահի թեկնածուն:

Րաֆֆի Հովհանիսյանի խոսքով՝ ազատ, արդար ընտրությունների դեպքում նա պատրաստ է շնորհավորել հաղթողին և ընդունել շնորհավորանքներ մրցակիցներից, հակառակ դեպքում՝ քաղաքացիական պայքարը կշարունակվի: