Վրաց հասարակությունը մտածում է այնպես, ինչպես արտահայտվել է Իլյան. Սամվել Կարապետյան

Ադրբեջանական լրատվամիջոցների կողմից տարածված այն տեղեկությունը, համաձայն որի՝ Վրաստանի պատրիարք Իլյա Երկրորդը Թիֆլիսում տեղի ունեցած Կովկասի մահմեդականների հոգևոր առաջնորդ Ալաշուքուր Փաշազադեի հետ հանդիպման ժամանակ հայտարարել էր, թե Ղարաբաղը եղել և մնում է Ադրբեջանի անքակտելի մաս, Հայաստանում դարձավ քննարկումների գլխավոր թեման:

Այսօր լրագրողների հետ հանդիպման ընթացքում «Քաղաքական հետազոտություններ» կենտրոնի ղեկավար Ալեքսանդր Մանասյանը, խոսելով վերոնշված թեմայի շուրջ, կարծիք հայտնեց, որ միշտ էլ Ադրբեջանը տարբեր իմաստներով է մեկնաբանում Արցախի հետ կապված ցանկացած հայտարարություն, և որ Ադրբեջանը որդեգրել է կեղծիքի և ապատեղեկատվության քաղաքական գիծը: 

«Կարծում եմ՝ վրաց պատրիարքը ոչ պաշտոնական ձևով հայտարարություն է արել և կարծել է, թե դա կմնա որպես խոհանոցային խոսակցություն: Իսկ մյուս տարբերակն այն է, որ Իլյան ասել է, ապա, մտածելով, որ դա վատ կանդրադառնա, ետ է կանգնել ասածից:

Ասուլիսի մյուս բանախոս պատմաբան, հուշարձանագետ, Հայաստանի, Արցախի, Հարավային Կովկասի այլ շրջանների հուշարձանների հետազոտող Սամվել Կարապետյանի խոսքով՝ այս ամբողջ ընթացքում վրաց մամուլը հեղեղված է ԼՂ անկախությանը դեմ նյութերով, քանի որ իրենք ունեն Աբխազիայի և Օսիայի խնդիր: Կորցրածը հետ բերելու առումով չեն կարող պաշտպանել Արցախի անկախությունը: Վրաց հասարակությունը մտածում է այնպես, ինչպես արտահայտվել է Իլյան: «Չեմ բացառում, որ Իլյան նման հայտարարությամբ հանդես է եկել՝ հույս ունենալով, որ դա չի հրապարակվի»,-նման տեսակետ հայտնեց Սամվել Կարապետյանը: