Ամենանշանակալի լուրը՝ Հայաստանի համար․ NVIDIA-ն համագործակցում է ՀՀ վարչապետի հետ․ Արամ Սարգսյան

Այս լուրը, Վաշինգտոնյան համաձայնությունից հետո, իմ համոզմամբ՝ ամենանշանակալի և ամենահուսադրողն է Հայաստանի համար։ Այս մասին Ֆեյսբուքի իր էջում գրել է «Հանրապետություն» կուսակցության նախագահ Արամ Սարգսյանը: 

 

«NVIDIA-ն համագործակցում է Հայաստանի վարչապետի հետ՝ տարածաշրջանում արհեստական բանականության հաշվարկների զարգացման նպատակով հազարավոր Blackwell գրաֆիկական պրոցեսորների տեղակայման համար։ Այս գործընկերությունը կբացի նոր հնարավորություններ նորարարության և տնտեսական աճի համար։

NVIDIA-ի գլխավոր տնօրեն Ջենսեն Հուանգ

 

NVIDIA-ի մուտքը Հայաստան ավելի մեծ նշանակություն ունի, քան ցանկացած հեղափոխություն․ այն կարող է դառնալ իսկապես շրջադարձային։ NVIDIA-ն այսօր ամենաարագ հարստացող ընկերությունն է․ նրա բաժնետոմսերը մեկ տարվա ընթացքում աճել են շուրջ 400 տոկոսով։ Ընկերության շուկայական կապիտալը հասնում է 4 տրիլիոն դոլարի, ինչը համարժեք է Հայաստանի շուրջ 600 տարվա բյուջեին։

 

Հայաստանի Հանրապետությունը իրական հնարավորություն ունի դառնալու NVIDIA-ի հենակետը տարածաշրջանում, և եթե Աստծո կամքով հաջողենք այդ գործում, ապա գիտության, տեխնոլոգիաների, տնտեսության, բարեկեցության և բազմաթիվ այլ ոլորտներում մենք 10-15 տարով առաջ կանցնենք մեր հարևաններից»,– գրել է նա։