ԱՄՆ-ն առաջին անգամ ՄԱԿ-ում չի աջակցել Վրաստանի տարածքային ամբողջականությանը

Միացյալ Նահանգները 17 տարվա ընթացքում առաջին անգամ չմիացավ ՄԱԿ-ի Անվտանգության խորհրդի մի քանի անդամների համատեղ հայտարարությանը Վրաստանի տարածքային ամբողջականության աջակցության վերաբերյալ։ Այս մասին հաղորդել է Коммерсантъ թերթը։

Օգոստոսի 19-ին ՄԱԿ-ի Անվտանգության խորհուրդը անցկացրել է իր ամենամյա նիստը՝ նվիրված 2008 թվականի օգոստոսյան հնգօրյա պատերազմի տարելիցին։ Ինչպես միշտ, այն ավարտվել է՝ առանց որևէ փաստաթուղթ ընդունելու։ Դրա ավարտից հետո Անվտանգության խորհրդի մի քանի անդամ երկրներ համատեղ հայտարարություն են տարածել, որում Աբխազիայում և Հարավային Օսիայում ռուսական զորքերի ներկայությունը անվանել են «անօրինական օկուպացիա» և աջակցել են «Վրաստանի ինքնիշխանությանը և տարածքային ամբողջականությանը միջազգայնորեն ճանաչված սահմաններում»։

Հայտարարությունը ստորագրել են Մեծ Բրիտանիան, Ֆրանսիան, Սլովենիան, Դանիան և Հունաստանը։ Սակայն 2008 թվականից ի վեր առաջին անգամ Միացյալ Նահանգները չի աջակցել Վրաստանի տարածքային ամբողջականության սկզբունքին։

Վաշինգտոնի այս դիրքորոշումը բուռն արձագանք է առաջացրել Վրաստանի հակակառավարական ուժերի շրջանում։ Ընդդիմությունը մեղադրել է իշխող «Վրացական երազանք» կուսակցությանը ամբողջ արտաքին քաղաքականության փլուզման և «գլխավոր ռազմավարական դաշնակցի»՝ Միացյալ Նահանգների հետ հարաբերությունների խզման մեջ։