Էդիկ Մինասյանը՝ ձայնագրության մասին. Դա իմ ձայնը չէ

Երեկ լրատվամիջոցներում տարածվեց մի ձայնագրություն, որում ԵՊՀ պատմության ֆակուլտետի դեկան Էդիկ Մինասյանն ուսանողներին ասում է, որ եթե նրանցից կամ դասախոսներից որևէ մեկը մասնակցի ցույցերին, ապա վերջինս կհեռացվի համալսարանից:

Այսօր այս մասին Lurer.com-ը զրուցեց Էդիկ Մինասյանի հետ, ով ձայնագրությունը որակեց ապուշություն և համարեց այն կազմակերպված սադրանք իր անձի շուրջ:

«Ապուշություն ա գիտեք: Ով գիտի՝ մոնտաժել են, հերթական պրովոկացիան է: Գրված է, թե ես 2008-ին դեկան եմ եղել, ես 2008-ին դեկան էլ չեմ եղել: Զարմանում եմ այդ ապուշությունը որտեղի՞ց են գտել, որտեղի՞ց են վերցրել. մոնտաժ են արել, սարքում են էլի փաստորեն, հերթական պրովոկացիան է: Հասկանում ե՞ք՝ այդպիսի բան չի կարող լինի, խուլիգանություն է: Հավանաբար հերքումով հանդես կգամ: Սենց էլ բան կլինի այ մարդ: Ես հերքում եմ, այդպիսի բան չկա: Դա իմ ձայնը չէ: Սարքել են, դրել են: Ո՞նց կարող էի 2008 թվին այդպիսի բան հայտարարել ուսանողներին, եթե ես դեկան չեմ եղել: Անտրամաբանական բան է եղել,-ասաց Էդիկ Մինասյանը և հավելեց,- նույն տիպի պրովոկացիա էին կազմակերպել նաև գրքերի հետ կապված, ինչպես նաև եկան դասը խանգարեցին, նույն այդ սկզբունքով աղմուկ-աղաղակ արեցին: Իրանց թվում էր՝ կարող են հանգիստ դաս խանգարել, մտնել լսարան, կոչեր անել, այ մարդ, ուսանողի կրթական իրավունքն է, ո՞նց կարելի է, բան ունեք ասելու, խնդրեմ, փողոցում ինչ կոչեր ուզում եք արեք: Եթե այդպես չանեի, դուրս է գալիս՝ ես դեկանի իմ պարտականությունները չպետք է կատարեի: Ուսանողությունը, դասախոսները դուրս են եկել միջանցքներ, գոռում-գոչյունով դասերը խանգարել են, վեր ու վար էին անում. այսինք թո՞ւյլ տայինք դասերը խանգարել: Ո՞վ նման դեկան կհանդուրժի: Ես ընդամենն ասել եմ՝ չի կարելի. տեսա՞ք ինչ պատմություն սարքեցին»:

Դեկանի խոսքով՝ Մարտի 1-ի դեպքերի առթիվ արդեն փաստաթղթեր են պատրաստվել, որը հոդվածի տեսքով անպայման կներկայացվի հանրությանը. «Մարտի 1-ի հանձնաժողովի եզրակացությունն է մեկ առ մեկ գրված, խնդրեմ՝ դրե՛ք, համեմատե՛ք՝ և՛ եզրակացությունն է գրված, և՛ տեքստը: Է՜, բողոքող էիք, գնայիք այդ ժամանակ եզրակացության դեմ բողոքեիք, թող այդ եզրակացությունը չլիներ: 2009 թվին  ռուսերեն լեզվով История Армении հրապարակված դասագիրք կա, որտեղ ընդդիմության հասցեին շատ ավելի մանրամասն գրված մեղադրանքներ կան, քան իմ մոտ, բայց իրենց ոչինչ չեն ասում: Սրանք հատուկ մտադրումով են անում: Ես զարմանում եմ, կեղծիքը իրենց մոտ սովորական է դարձել»,-նշեց Էդիկ Մինասյանը: