Կարող է թվալ՝ հատուկ տաղանդ է պետք, որ անգամ արմատական ընդդիմադիրը կարողանա այդտեղ «կեղտ գտնել». Թունյան

ԱԺ «Քաղաքացիական պայմանագիր» խմբակցության պատգամավոր Բաբկեն Թունյանը «Ֆեյսբուք»-ի իր էջում հիշեցրել է, որ Ծիծեռնակաբերդի հուշահամալիրը վերանորոգվում է, փոխվում են մաշված և շարքից դուրս եկած բազալտից քարերը: Պատգամավորն անդրադարձել է այս ամենից աղմուկ բարձրացնող ընդդիմադիրներին:

«Լավ բան է չէ՞ արվում: Կարող է թվալ՝ հատուկ տաղանդ է պետք, որ անգամ արմատական ընդդիմադիրը կարողանա այդտեղ «կեղտ գտնել»: Բայց մեր գերտաղանդավոր ընդդիմադիրներին երբեք չի կարելի թերագնահատել. նրանք արդեն հասցրել են դավադրապաշտական թեզեր կառուցել, որակել «կասկածելի» շինարարություն, որոշներն էլ ավելի հեռուն են գնացել՝ հայտարարելով, որ դավաճան իշխանությունները Ալիևի պահանջով վերացնում են Հայոց ցեղասպանության զոհերի հուշահամալիրը:

Սա ինձ հիշեցրեց 3 տարի առաջ տեղի ունեցածը, երբ Ազգային ժողովի շենքի ճակատային հատվածում տեղադրված ՀՀ պետական զինանշանը մի քանի օրով հանվել էր արտաքին տեսքի թարմացման ու վերանորոգման նպատակով, և որոշ մարդիկ վայնասուն էին բարձրացրել, թե բա՝ զինանշանը հավերժ հեռացնում են:

Հիշեցրեց նաև, թե ինչպես էին ոմանք լուրջ դեմքով հայտարարում, որ Դիլիջանի թունելը փակվել է ոչ թե վերանորոգման համար, այլ այն պատճառով, որ դավաճան իշխանությունները պատրաստվում են տարածքներ զիջել թշնամուն, թունելն էլ փակում են, որ մեր զինված ուժերը չկարողանան հասնել այդ տարածքներ:

Երբ ԱԺ շենքի ճակատին կրկին հայտնվեց նոր, թարմացված զինանշանը, հիմար հայտարարություններ տարածողներից ոչ մեկ ներողություն չխնդրեց:

Երբ Դիլիջանի թունելը բացվեց, վերանորոգված, ոչ ոք ներողություն չխնդրեց:

Էլի օրինակներ կարող եմ բերել, բայց երկուսն էլ բավական են:

Եվ երբ ամիսներ անց, մինչև հաջորդ Ապրիլի 24-ը, Ծիծեռնակաբերդի վերանորոգված հուշահամալիրը կբացվի այցելուների առաջ, կրկին ոչ ոք ներողություն չի խնդրի: Որովհետև զբաղված կլինեն հերթական դրական երևույթը սևացնել փորձելով:

Այս մարդկանցից ուրիշ բան չի էլ կարելի սպասել, որովհետև նրանց նպատակն ամեն ինչ սևացնելն է, ամեն գնով հուսալքություն, վատատեսություն ու նեգատիվ տարածելն է: Ցանկացած դրական կամ ուրախ բան (լինի համերգ, նոր դպրոց, թե լուրջ միջոցառում) նրանց տվայտանքների մեջ է գցում ու զրկում քնից:

Վատն այն է, որ սեփական ժողովրդի հույզերի վրա խաղացող, ժողովրդին չհարգող, մոլորեցնող, սեփական երկիրը թալանած, գաղջ տարածող ու սուգը տոնող այս մարդկանց ժամանակին բարձր պետական պաշտոններ են վստահված եղել, ու մենք մոտ 30 թանկ տարիներ ենք կորցրել նորմալ երկիր կառուցելու ճանապարհին:

Լավն այն է, որ մեր ժողովուրդն արդեն իմունիտետ ունի այս տեսակ բաների նկատմամբ, և հիշողություն, որը չպետք է թույլ տա, որ այս մարդիկ կրկին որոշեն իր ճակատագիրը:

Բոլորիս համբերություն և ամուր նյարդեր»,- գրել է Թունյանը: