«Ուսուցիչների տարակարգի հավելավճարների մի մասն է վճարվել»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Փոխնախարարը հայտնում է՝ ուսուցիչների տարակարգի հավելավճարները նախարարությունն ամբողջությամբ հատկացրել է, սակայն դրանց մի մասն է վճարվել ուսուցիչներին:

ԿԳՄՍ նախարար Ժանա Անդրեսայանին տեղեկատվական հետևյալ հարցումն եմ արել․ «Տավուշի մարզի հանրակրթական դպրոցների ուսուցիչներին տարակարգի համար նախատեսված հավելավճարները 60 տոկոսի չափով են տրվում, մնացած գումարները տարեվերջին են տրվելու: Դրա պատճառը պետբյուջեում փողի պակա՞սն է, թե այլ բան»։ Այս տեղեկատվական հարցմանս Տավուշի մարզպետարանից պատասխանել են․ «Հարցի վերաբերյալ առաջարկում ենք դիմել համապատասխան լիազոր մարմնին՝ ԿԳՄՍ նախարարություն»: Ի՞նչն է պատճառը, որ տարակարգի համար նախատեսված հավելավճարները 60 տոկոսի չափով են տրվում»։

ԿԳՄՍ նախարարի տեղակալ Արաքսիա Սվաջյանի ստորագրությամբ պատասխանում նշված է․ «2025 թվականի ՀՀ պետական բյուջեով հաստատված Տավուշի մարզպետարանի հետ կնքված պայմանագրերի շրջանակում Հանրակրթության ծրագիր «Ատեստավորման միջոցով տարակարգի որակավորում ստացած ուսուցիչներին համապատասխան հավելավճարի տրամադրման ապահովում» միջոցառման՝ կիսամյակի համար նախատեսված 4042.7 հազար դրամ գումարն ամբողջությամբ հատկացված է Տավուշի մարզի ուսումնական հաստատություններին»:

ԿԳՄՍ նախարարությունը տարակարգի որակավորում ստացած ուսուցիչներին տրվող համապատասխան հավելավճարների գումարները հատկացրել է, սակայն տարակարգ ունեցող տավուշցի ուսուցիչները հավելավճարների մոտ 60 տոկոսի չափով են ստացել։ Ո՞ւր են մնացած գումարները, դա կիմանան Տավուշի մարզպետի աշխատակազմում»։