Նախագահի թեկնածու Պավլիկ Սարգսյանը դիմել է ՄԻՊ՝ 8 մլն ընտրագրավը հակասահմանադրական ճանաչելու համար

Փետրվարին կայանալիք ՀՀ նախագահի ընտրություններում առաջադրված թեկնածու Պավլիկ Սարգսյանը ՀՀ ընտրական օրենսգրքով սահմանված 8 մլն դրամ ընտրագրավի վճարման պահանջը հակասահմանադրական է համարում, քանի որ այն խոչընդոտում է ընտրվելու իր իրավունքը: Այս առթիվ Պավլիկ Սարգսյանը դիմում է ներկայացրել ՄԻՊ գրասենյակ:

Տեղեկացնենք, որ կենտրոնական ընտրական հանձնաժողովը որոշել է 48 ժամ տրամադրել ՀՀ նախագահի ինքնառաջադրված մի քանի թեկնածուներին, այդ թվում՝ Պավլիկ Սարգսյանին՝ փաստաթղթերում առկա թերությունները շտկելու և դրանք ամբողջությամբ լրացնելու համար, քանի որ վերջիններիս գրանցվելու համար ներկայացված փաթեթում բացակայել է անհրաժեշտ մի քանի փաստաթուղ, մասնավորապես՝ ընտրագրավի անդորրագիրը:

Lurer.com-ի հետ զրույցում ՄԻՊ մամուլի քարտուղար Նաիրա Կարմիրշալյանը ասաց, որ մի քանի ժամ առաջ է նախագահի թեկնածուի դիմումը հասել գրասենյակ:

«Դիմումը պետք է ուսումնասիրենք, գրություն գրենք ՍԴ, նրա դիմումի հիման վրա վարույթ ենք հարուցելու, և մեր իրավաբաններն այժմ ուսումնասիրում են այն: Նախ պետք է ուսումնասիրենք դիմումում բարձրացված խնդիրը, պետք է պարզվի՝ արդյոք օրենքի վիճարկվող դրույթը հակասում է ՀՀ Սահմանադրությանը, ինչպես նաև պետք է ուսումնասիրվի միջազգային փորձը, որից հետո անհրաժեշտության դեպքում պաշտպանը կդիմի Սահմանադրական դատարան: Գործընթացը կտևի առավելագույնը 30 օր, որն էլ հենց օրենքով սահմանված կարգն է»,-ասաց Նաիրա Կարմիրշալյանը: