Այս սերնդին հնարավոր չի որևէ բան պարտադրել, խաբել․ ՔՊ–ական պատգամավոր

ԱԺ «Քաղաքացիական պայմանագիր» խմբակցության պատգամավոր Բաբկեն Թունյանի ֆեյսբուքյան գրառումը․ «Մենք հրաշալի երեխաներ ունենք: Հասկացող, մտածող, ազատամիտ, համարձակ, իրենց կարծիքը արտահայտել չվախեցող, իրենց հարցերով քեզ նեղը գցող, պրպտող, հնարամիտ, հետաքրքրասեր, սկզբունքային, հպարտ, նպատակասլաց: Լուսավոր:

Այս սերունդին հնարավոր չի և վաղն էլ հնարավոր չի լինելու որևէ բան պարտադրել, խաբել, մանիպուլացնել, «գնել», վախեցնել կամ ազատությունը սահմանափակել: Այս սերունդը ինքն է պարտադրում, որ իրեն հարգանքով վերաբերվեն: Ոչ թե ստիպեն, այլ բացատրեն, ոչ թե արգելեն, այլ վստահեն:
Այսօրվա երեխան չի ուզում որևէ բան անել զուտ այն պատճառով, որ ասում են՝ այդպես է պետք: Նա ուզում է հասկանալ, ուզում է համոզվել, ուզում է իր հետ հաշվի նստեն, ապացուցեն, հիմնավորեն: Ու ասեմ, դա հեշտ գործ չի. «գլխառադ» անել չի ստացվի, պետք է մեծ պատասխանատվությամբ ու լրջությամբ վերաբերվել: )) Սա, իհարկե, մեծերի գործը մի քիչ բարդացնում է, շատ դեպքերում կարող է ստիպել, որ սովորեցնելուց առաջ նախ մե՛նք սովորենք, գրքերից, ինտերնետից կամ արհեստական բանականության օգնությամբ ճշտենք ու թարմացնենք իմացածը, որովհետև, ինչպես նշեցի, մեր առջև կանգնած մարդուկի հարցին «անլուրջ» վերաբերվելը լուրջ հետևանքներ կունենա հենց մեզ համար)))

Ասենք, դժվար է հիմնավորել, թե ինչու պիտի երեխան երկու էջ անգիր սովորի, եթե ինքն այդ պահին բացահայտում է, որ տարիներ առաջ դու էլ ես դա սովորել, բայց անգամ մի քառյակը չես հիշում )) Կամ եթե անգամ հիշում ես, պիտի կարողանաս հիմնավորել, թե դա քեզ կյանքում ինչ է տվել: Հիմնավորելն անհնար չի, բայց համաձայնեք, որ հեշտ էլ չի, ու չի բացառվում, որ վերջում ինքը քեզ համոզի, որ անգիր սովորել պետք չէ))

Միգուցե կասեք՝ միշտ է այդպես եղել, բայց, իմ կարծիքով, այսօրվա սերունդը չափազանց յուրահատուկ է ու տարբերվող: Եվ մենք՝ մեծերս, էդպես հեշտ չենք պրծնի՝ «պետք է լավ սովորել» ասելով: Դա ապացուցել է պետք: Ու ոչ միայն խոսքերով, այլ այնպիսի միջավայր ձևավորելով, որ երեխան փոքր տարիքից ի՛նքը տեսնի ու համոզվի՝ կյանքում հաջողելու համար դեր են խաղում ոչ թե ծանոթ-բարեկամը, փողը, սուտը կամ զոռբայությունը, այլ գիտելիքը, աշխատասիրությունն ու ազնվությունը: Եվ սրան զուգահեռ, նրանց կրթվելու և առաջ գնալու համար պայմաններ ապահովել՝ խաղաղ պայմաններով, որակյալ կրթական համակարգով, առողջ պետական ինստիտուտներով:

Ես մի գրամ կասկած չունեմ, որ վաղվա Հայաստանը ավելի լավն է լինելու, բարեկեցիկ, լուսավոր ու անվտանգ, որովհետև վաղվա Հայաստանը մեր այսօրվա այս հրաշքներն են:

Շնորհավոր սեպտեմբերի 1»։