«168 ժամ». Հայ երգիչ-երգչուհիներից ովքե՞ր են երգելու և նկարահանվելու Սերժ Սարգսյանի նախընտրական տեսահոլովակում

Ինչպես հայտնի է՝ «Շարմ» հոլդինգը ՀՀ գործող նախագահ, նախագահի թեկնածու Սերժ Սարգսյանի նախընտրական քարոզչության շրջանակներում ներկայումս նոր երգի հիման վրա տեսահոլովակ է նկարահանում: «168 ժամ»-ի թղթակիցը փորձել է պարզել, թե հայ երգիչ-երգչուհիներից ովքե՞ր են երգելու և նկարահանվելու տեսահոլովակում: Երգչուհի Լեյլա Սարիբեկյանն ասել է, որ առաջին անգամ է նման բան լսում. «Ինձ ոչինչ չի առաջարկվել»: Հարցին, թե առաջարկ լինելու դեպքում կերգե՞ք, նա պատասխանել է. «Ընդհանրապես ոչ մի քաղաքական ուժի նախընտրական քարոզարշավի տեսահոլովակի համար չեմ երգել: Երգելու համար պետք է երգն արժեքավոր լինի կամ իր մեջ ինչ-որ հետաքրքիր բան պարունակի: Դրա մեջ ես ոչ մի վատ բան չեմ տեսնում: Ինձ ամեն ինչի մեջ չեն րնդգրկում, որովհետև գիտեն, որ ես էլ չեմ ցանկանում ամեն ինչի մեջ լինել»:

Աժ ՀՀԿ խմբակցության պատգամավոր, երգչուհի Շուշան Պետրոսյանն էլ թերթի հետ զրույցում տեղեկացրել է, որ տեսահոլովակը վաղուց է նկարահանվել, որտեղ ինքն էլ է երգել և նկարահանվել: «Շատ հայտնի ու սիրված արտիստներ են երգել, այդ թվում՝ Նունե Եսայան, Լիլիթ Հովհաննիսյան, Միհրան Ծառուկյան, Հայկո և այլք»,- ասել է պատգամավորը: Հարցին, թե ովքե՞ր են երգի խոսքերի և երաժշտության հեղինակները, Շ. Պետրոսյանը պատասխանել է. «Խոսքերի հեղինակին չգիտեմ, կոմպոզիտորի անունն էլ Ալբերտ է, ազգանունը չեմ հիշում»: Իսկ թե երբ կլինի երգի պրեմիերան, Աժ պատգամավորը չգիտի: