«168 ժամ». Մենք ունենք ինքնակառավարման համակարգի կարիքը

«Բոյկոտը շատ լավ բան է, եթե դու ասում ես՝ «ես այս քաղաքական համակարգը՝ և՛ դրսի, և՛ ներսի, չեմ ընդունում, այն ինձ համար մեռած է», քանի որ դրսի ուժերն են տնօրինողները»,- «168 ժամ»-ի թղթակցի հետ զրույցում ասել է «Ղարաբաղ» կոմիտեի նախկին անդամ Աշոտ Մանուչարյանը՝ մեկնաբանելով բոյկոտը՝ որպես քաղաքական երևույթ:

Իսկ անդրադառնալով ՀԱԿ-ին, Ա.Մանուչարյանն ասել է. «5 տարի առաջ հռչակեցին, ասացին՝ ստեղծում ենք քաղաքական ուժ՝ համանմանությամբ Հնդկաստանի ազգային կոնգրեսի, որը Գանդին հայտարարել էր հնդիկ ժողովրդի ինքնակառավարման համակարգ՝ անգլիական օկուպացիայի պայմաններում: Այժմ մենք ունենք այդ ինքնակառավարման համակարգի կարիքը, դա կարող էին ստեղծել Կոնգրեսի ավանդական քաղաքական մտքից դուրս հսկայական մի զանգված, որը Կոնգրեսն այսօր մեծամասամբ կորցրել է»:

Ըստ նրա՝ խոսքը մտածող երիտասարդության մասին է, ովքեր ՀԱԿ-ում մի քանի հազար էին: «Սա ամենամեծ պոտենցիալն է այս երկրի համար և Կոնգրեսի մեծագույն նվաճումը: Հետո նրանց քշեցին՝ փաստորեն զրոյացնելով նրանց ակտիվությունը և ասելով՝ «մենք քաղաքական գործիչներով յոլա կտանենք»: Էլի թող «յոլա» տանեն, թող բոյկոտ անեն, բայց ամենակարևորը՝ թող նաև հետ կանչեն այդ երիտասարդներին, եթե կարող են նրանց ներողամտությունը հայցել»,- ասել է Ա.Մանուչարյանը: