Ո'չ «ալիևները», ո'չ «էրդողանները»՝ որքան էլ դավեր նյութեն, հայ ժողովրդին ոչնչացնել չեն կարող. Մերուժան Տեր–Գուլանյան

Օրվա խորհուրդը մեր ժողովրդի հավերժական հայի անմահությունն է, այսօրվա մեր հրաշալի լուսավոր տղերքի, որոնք մեզ համար գնացին, զոհվեցին և ոչ միայն իրենց հիշատակն է, այլ բոլոր նրանց հիշատակը, ում շիրիմները մնացին Արցախում և հարազատները նույնիսկ հնարավորություն չունեն մոմ վառելու, հիշելու, խոնարհվելու։ Այս մասին, այսօր՝ սեպտեմբերի 2–ին, Եռաբլուրում «Արցախի կանչը» հուշահամալիրի բացման արարողության ժամանակ լրագրողների հետ զրույցում նշեց գրող, հրապարակախոս Մերուժան Տեր–Գուլանյանը։

«Փառք ու պատիվ Արթուր Վանեցյանին և իր խմբին, որ այս հրաշալի գործը արեցին։ Մենք չենք պարտվել, մեր ազգը չի պարտվել, մենք վերադարձնելու ենք ամենը ինչ, արցախցին պիտի գնա Արցախում ապրի։ Պատերազմ չի լինելու, կգան մարդիկ, որոնք բանակցություններով կանեն այդ ամեն ինչը և արցախցին կվերադառնա Արցախ։  Ես համոզված եմ դրանում»,–ասաց նա՝ հավելելով, որ դա լինելու է իշխանափոխությունից հետո. «Իշխանությունների մասին չեմ ուզում խոսեմ, որովհետև իրենք Արարատն են ուրանում նույնիսկ։ Մեր ժողովրդին ոչ Ալիևները, ոչ Էրդողանները, ոչ որևէ մեկը, ոչ Իսրայելը կամ Անգլիան, ինչքան էլ դավեր նյութեն, անհնարին է հայ ժողովրդին կարողանան ոչնչացնել, ինչպես շատ ուզում էին անել և հիմա էլ են ուզում անել: Դա անհնարին է»։