HSBC. Չինաստանը կմեծացնի իր ազդեցությունը զարգացող երկրների վրա

Չինաստանը, ավելի քան ԱՄՆ-ն կամ Եվրոպան, ազդեցություն կունենա զարգացող երկրների տնտեսությունների վրա, քանի որ աշխարհի խոշորագույն արտահանողը մեծացնում է իր ներդրումը համաշխարհային տնտեսության մեջ: Այս մասին նշվում է HSBC Holdings-ի զեկույցում. փոխանցում է Вести.ru-ն:

«Մենք հեռանում ենք ԱՄՆ-ի և Եվրոպայի առաջնեկությունից, աշխարհի գլխում կանգնած կլինի Չինաստանը: 2014 թվականին Չինաստանը պատմության մեջ խոշորագույն ներդրումը կկատարի համաշխարհային տնտեսության մեջ»,-նշել է HSBC-ի գլխավոր տնտեսագետ Սթիվեն Քինգը: Քինգը նաև ընդգծել է, որ Չինաստանի տնտեսական աճի տեմպերն այս տարի կավելանան մինչև 8,6% 2012 թվականի 7,8%-ի համեմատ և աճի նման տեմպերը օգուտ կբերեն հարևան երկրներին, ինչպես նաև զարգացած ապրանքային շուկա ունեցող երկրներին:

«Համաշխարհային տնտեսությունը, հատկապես զարգացող շուկաներում, ավելի շատ դրայվերներ է ստանում նոր աշխարհից, ինչի համար լավ օրինակ է Չինաստանի ուժը և նրա աճող ներդրումը համաշխարհային տնտեսության աճում»,-նշում է HSBC-ի՝ Կենտրոնական և Արևելյան Եվրոպայի, ինչպես նաև Աֆրիկայի երկրների գծով գլխավոր տնտեսագետ Մուրատ Ուլգենը: Չնայած որ Չինաստանի աճի սպասվող տեմպերն այս տարի այդքան էլ մեծ չեն, ինչպես անցյալում նկատվող 10% կամ 11%-անոց մակարդակը, Չինաստանն այժմ չափերով մեծ տնտեսություն ունի, և այդ պատճառով Չինաստանի ներդրումը համաշխարհային տնտեսության մեջ ավելի մեծ է: