Երկրի տոլի 2-րդ, տոլի 3-րդ պաշտոնն ինձ չի խանգարում ու չի խանգարի որևէ մեկի հետ շփվել․ Ալեն Սիմոնյան

ԱԺ նախագահ Ալեն Սիմոնյանը Ֆեյսբուքի իր էջում գրել է․

«Դե ինչ, դիտեցի ԱրմՔոմեդիի տղաների 15 րոպեանոց արդարանալն առ այն, թե ինչու է իրենց իսկ սոցիալական գովազդը դիսոնանսի մեջ մտնում իրենց պահվածքի հետ: Պարզվում է՝ մի դեպքում մենք իրար չենք տեսել, մի դեպքում ես պետք է բարևեի)) Հետո այս դիալոգը կամաց վերածվեց քննարկման, թե ինչ եմ ես ասել գերիների վերաբերյալ, ճի՞շտ եմ ասել, թե՞ ոչ, ու զավեշտն այն է, տղերք, որ կարելի էր գոնե 1 անգամ դիտել, թե ինչ եմ ասել, նոր մեղադրել կամ պաշտպանել դա: Հետո ամեն բան շատ ավելի խառնվեց իրար, անցում կատարվեց նրան, որ այն ամենից հետո, ինչ եղավ, պետք էր հրաժարական տալ՝ մոռանալով, որ տվել ենք ու նորից ընտրվել, հետո սկսեցին նեղսրտել, որ ընտրվել ենք:

Տղե՛րք, 2020 թվականից հետո ավելի քան 200 գերի է եղել, որոնց 90%-ն արդեն վերադարձել են, իսկ մնացածի համար տարվում է աշխատանք և վստահ եմ, որ նրանք էլ տուն կվերադառնան: Պատասխանատվությունը 2020-ից հետո մենք ենք որոշել և տվել հայ ժողովրդին դատին, մեր նախաձեռնությամբ հրաժարական ենք տվել և նորից գնացել արդար, թափանցիկ ընտրությունների: Իսկ այն, ինչն ասել եմ այն ժամանակվա գերիների մասով, հրապարակային ասելու բան չէր, բայց դրա մեջ ոչ մի սխալ բան չկար:

Նման բաներն են պատճառը, որ ասում եմ մակերեսային եք խոսում, և մի թերագնահատեք այն, ինչ անում եք և մի այսահարվեք ինձանից, մարդուց, ում հյուրնկալել եք Ձեր տանը, ում հետ աշխատել եք և մտերմություն արել, նորմալ է, որ ես Ձեզ անդրադառնում եմ 4, 5, պետք լինի՝ 6-րդ անգամ էլ կանդրադառնամ իմ՝ ձեր ձևակերպմամբ՝ երկրի տոլի 2-րդ, տոլի 3-րդ պաշտոնն ինձ չի խանգարում ու չի խանգարի որևէ մեկի հետ շփվել: Ասելիք շատ կա, Ձեզ մի օր, թե առիթ կլինի, գուցե կասեմ: Ես էլ Ձեզ եմ բարևում»: