Վրաստանը մեղադրանք է առաջադրել Սահակաշվիլիի նախկին կուսակցության առաջնորդին

Վրաստանի գլխավոր դատախազությունը մեղադրանք է առաջադրել նախկին նախագահ Միխեիլ Սահակաշվիլիի կողմից հիմնադրված ընդդիմադիր «Միացյալ ազգային շարժում» կուսակցության նախկին առաջնորդ Լևան Խաբեշվիլիին՝ կառավարության տապալման հրապարակային կոչ անելու համար։ Այս մասին ճեպազրույցի ժամանակ հայտարարել է դատախազ Բեկա Կվիցիանին, հաղորդում է ՏԱՍՍ-ը։

Ըստ մեղադրողի՝ Խաբեշվիլին այս տարվա հունիսից հեռուստատեսությամբ և սոցիալական ցանցերի միջոցով կոչ է անում Վրաստանի քաղաքացիներին տապալել կառավարությունը՝ նշելով կոնկրետ ամսաթիվ և վայր։

Խաբեշվիլին ձերբակալվել է սեպտեմբերի 11-ին։ Սկզբում նրան մեղադրել են իրավապահ մարմինների աշխատակիցներին կաշառելու խոստում տալու մեջ։ Դատախազության տվյալներով՝ նա ոստիկանության աշխատակիցներին առաջարկել է 200 000 դոլար՝ գաղտնի տեղեկատվության փոխանցման դիմաց։