Հայտնի են դարձել խմբակային բռնաբարության զոհ հնդկուհու գործի մանրամասները

23-ամյա հնդկուհու բռնաբարության և սպանության մեջ մեղադրվող 6 տղամարդիկ հանցագործության օրը՝ երեկոյան, հատուկ մտադրություն են ունեցել որևէ զոհ գտնել՝ իրենց զայրույթը նրա վրա թափելու համար: Այս մասին ուրբաթ օրը հայտնում է Reuters-ը՝ վկայակոչելով Հնդկաստանի ոստիկանության կազմած զեկույցը:

Դատախազությունը հետաքննությանն է տրամադրել 600 էջից բաղկացած փաստաթուղթը, որտեղ ապացուցվում է մեղադրյալների հանցանքը: Փաստաթղթին կից եղել են խոստովանություններ, ականատեսների վկայություններ, հեռախոսային խոսակցությունների ձայնագրություններ, բժշկական եզրակացություններ, ԴՆԹ-ի անալիզներ: Իրեղեն ապացույցների մեջ են եղել նաև զոհի արյան հետքերով տղամարդկանց շապիկներն ու հարձակման ժամանակ որպես սպառնալիքի միջոց օգտագործված զենքը:

Զեկույցից պարզ է դարձել, որ դեկտեմբերի 16-ին խմբակային բռնաբարություն իրականացրած 6 տղամարդիկ Դելիի հարավում գտնվող աղքատ թաղամասում ընթրիքի ժամանակ նպատակադրվել են որևէ կին գտնել և սպանել նրան: Դիտավորությունն իրականացնելու ճանապարհին նրանք տեսել են կինոյից տուն վերադարձող աղջկան իր ընկերոջ հետ: Ապա նրանց 2-ին էլ քարշ են տվել և մտցրել ավտոբուս, ծեծել տղային և դուրս շպրտել ավտոբուսից, հետո բռնաբարել աղջկան՝ օգտագործելով մետաղական շղթաներ: Այնուհետև աղջկան նետել են ավտոբուսից դուրս և փորձել գցել ավտոբուսի անիվների տակ, սակայն աղջկա ընկերոջը հաջողվել է նրան մի կողմ քաշել:

Հաջորդ օրը ոստիկանությունը տեսախցիկների արձանագրած տեսագրությունների միջոցով կարողացել է բերման ենթարկել հանցագործներին:

Աղջիկը տարած ծանր վիրահատությոններից հետո դեկտեմբերի 29-ին մահացել էր: Դեպքը մեծ աղմուկ է առաջացրել Հնդկաստանում: Հազարավոր մարդիկ փողոց են դուրս եկել՝ պահանջելով ոչ միայն մահապատիժ սահմանել հանցագործների, այլև մեթոդներ ձեռնարկել կանանց նկատմամբ բռնությունների դեմ պայքարելու համար: