Առաջին դասընթացը՝ ԱԻ նախարարի մասնակցությամբ

Այսօր ՀՀ ԱԻ նախարար Արմեն Երիցյանը հանդիպել է նախարարության համակարգում աշխատանքի մրցույթի նախնական փուլը հաղթահարած հաշմանդամներին։ Հանդիպմանը ներկա էին նաև ԱԻՆ փրկարար ծառայության, տեխնիկական անվտանգության ազգային կենտրոնի և ԱՌՆԱՊ հիմնադրամի տնօրենները, ինչպես նաև հաշմանդամների խնդիրներով զբաղվող «Ունիսոն» ՀԿ ղեկավարը։

Հարցազրույցների արդյունքներով ընտրված հաշմանդամություն ունեցող 14 քաղաքացի կմասնակցի վերապատրաստման դասընթացների, որից հետո պարզ կլինի արդյոք նրանք պատրա՞ստ են աշխատանքի անցնել նախարարության համակարգում, թե ոչ։

Ողջունելով հանդիպման մասնակիցներին՝ ԱԻ նախարար Ա. Երիցյանը մասնավորապես ասաց.
- Այստեղ աշխատանքի պահանջները շատ խիստ են, քանի որ մենք հիմնականում գործ ենք ունենում արտակարգ իրավիճակների, մարդկային կյանքի հետ, սակայն մենք ձեր նկատմամբ կցուցաբերենք անհատական մոտեցում՝ հաշվի առնելով յուրաքանչյուրիդ գիտելիքներն ու կարողությունները։ Մենք աշխատել ենք ձեզ համար ստեղծել բոլոր անհրաժեշտ պայմանները և ապահովել տրանսպորտով' աշխատանքի գնալ-գալու համար։ Դուք պիտի դառնաք մեր անձնակազմի լիարժեք անդամներ և մյուսների նման աշխատեք' պահպանելով ներքին կանոնակարգերն ու կրելով համազգեստ։ Մեզ անհրաժեշտ են պատրաստակամ, պատասխանատու, աշխատասեր ու գրագետ մարդիկ, որոնցից լավագույնները կունենան առաջխաղացման հնարավորություն և կուղարկվեն արտերկիր՝ վերապատրաստման։ Սկզբում, իհարկե, կարող են դժվարություններ լինել, սակայն հուսով եմ, որ մենք դրանք միասին կհաղթահարենք ու կգնանք առաջ։

Անկաշկանդ միջավայրում անմիջական շփման ընթացքում նախարարն անհատապես ծանոթացավ աշխատանքի մրցույթի նախնական փուլն անցած հաշմանդամների հետ՝ հետաքրքրվելով նրանցից յուրաքանչյուրի կրթության, աշխատանքային փորձի և հետաքրքրությունների մասին։ Մրցույթի այս փուլն անցած հաշմանդամների մեծ մասն ունի բարձրագույն կրթություն, աշխատանքային փորձ, տիրապետում են օտար լեզուների և համակարգչին։

Դիմելով վերջիններիս հարազատներին, որոնք նույնպես ներկա էին հանդիպմանը՝ ԱԻ նախարար Ա. Երիցյանը հավաստեց, որ ընդունվելով ԱԻՆ համակարգ' նրանց զավակները գտնվելու են հուսալի ձեռքերում՝ ապահովված աշխատանքի համար անհրաժեշտ բոլոր պայմաններով և ստանալով պատշաճ վարձատրություն։

Նախնական փուլում տրանսպորտի հետ կապված խնդրի լուծմանն աջակցում է «Ունիսոն» հասարակական կազմակերպությունը՝ «ԼԱՅՖ» ծրագրի շրջանակներում, որը ԱՄՆ միջազգային զարգացման գործակալության օգնությամբ իրականացնում է «Սեյվ դը Չիլդրեն» կազմակերպությունը։

Հանդիպմանը հրավիրված հաշմանդամները ծանոթացան նաև ԱԻՆ ճգնաժամային կառավարման կենտրոնի և «911» ծառայության առաքելությանը, գործունեության սկզբունքներին և իրենց ապագա աշխատանքի առանձնահատկություններին։