Աֆղանստանի և ԱՄՆ-ի նախագահներն այսօր կհանդիպեն

Աֆղանստանը կանգնած է դրամատիկ փոփոխությունների շեմին: ՆԱՏՕ-ն ցանկանում է դուրս հանել իր զորքերն այդ տարածքից, և հայտնի չէ, թե դեռևս որքան ժամանակ զինվորականները կմնան Աֆղանստանի տարածքում: Նախագահ Համիդ Քարզայը իր այցելության ժամանակ ցանկանում է զրուցել Սպիտակ տան ղեկավարի հետ իր ապագա ռազմավարական ծրագերի մասին, ինչպես նաև իր զայրույթն արտահայտել ԱՄՆ-ի նկատմամբ, գրում է Der Spiegel գերմանական պարբերականը:

Երկու նախագահների հանդիպումը նախատեսված է այսօր: Բանակցությունները կընթանան Ջորջթաունի համալսարանում: Զրույցի ընթացքում Քարզայը ցանկանում է իր բողոքն արտահայտել ԱՄՆ-ի նկատմամբ: Նախկին հանդիպումներից և զրույցներից հետո Աֆղանստանում գրեթե ոչինչ չի փոխվել, ուստի այժմ ակնկալվում է, որ Քարզայը կարող է իր քննադատական վերաբերմունքն արտահայտել: Այդ պատճառով հանրությունը հատկապես լարվածությամբ է սպասում Օբամայի հետ նրա հանդիպմանը:

Քարզայը Օբամայի հետ երբեք այնպիսի մտերիմ հարաբերությունների մեջ չի եղել, ինչպես նրա նախորդի՝ Ջորջ Բուշի հետ էր: Քարզային հատկապես վրդովեցնում էր Աֆղանստանում ԱՄՆ սահմանապահ զորքերի դաժան և անհարգալից վերաբերմունքը աֆղանների նկատմամբ:
Հանդիպման ընթացքում քննարկվելու են Աֆղանստանում ԱՄՆ-ի զորքերի մնալու ժամկետները: ԱՄՆ-ը պլանավորում է մինչև 2014թ. Աֆղանստանից դուրս բերել 66 հազար զինծառայողների՝ այնտեղ թողնելով միայն 7 հազարը՝ երկրում ահաբեկչության դեմ պայքարելու հարցում աֆղանական իշխանություններին օգնություն ցուցաբերելու համար: