Ու՞մ են շնորհակալ հայ հայտնիները

Այսօր Շնորհակալության միջազգային օրն է, ինչի առիթով esyes.am-ն անդրադարձավ հայտնիների շնորհակալություններին:

Տարեվերջին երգչուհի Քրիստինե Պեպելյանը շնորհակալություն հայտնեց՝ ներկայացնելով իր «Շնորհակալ եմ» ձայնասկավառակը: Ըստ Քրիստինեի՝ պետք է կյանքին շնորհակալ լինել ամեն օրվա համար. «Շնորհակալ լինելու շատ առիթներ ունեմ: Պետք է գնահատել այն, ինչ կյանքում տրվում է: Շնորհակալ եմ իմ հանդիսատեսին՝ աշխատանքս գնահատելու համար»,- esyes.am-ի հետ զրույցում շնորհակալ եղավ երգչուհին:

Այսօր մայրացած Գոհար Հարությունյանն էլ շնորհակալ է իր մայրիկին, որ իրեն լույս աշխարհ է բերել. «Ծննդաբերության ընթացքում մտածում էի, որ մայրս էլ է անցել այս ամենի միջով, որպեսզի ինձ լույս աշխարհ բերի»: Գոհարը շնորհակալ է նաև ամուսնուն, ով հոգեբանական հանգստությամբ է պարուրում իրեն ու աջակցում բոլոր հարցերում. «Շնորհակալ եմ նաև հայերին՝ իրենց ջերմության և իմ հանդեպ սիրո համար»:

Դերասան, մոդել Մովսես Երեմյանը շնորհակալ է ծնողներին՝ իրեն կյանք պարգևելու համար, ինչպես նաև ընկերներին ու այն մարդկանց, որոնցից ինչ-որ բան է սովորել:

Դերասանուհի Լուիզա Ներսիսյանը շնորհակալ է մայրիկին՝ իրեն համբերատար, ինքնուրույն և ազնիվ մարդ դաստիարակելու համար:

Հաղարդավարուհի Արևիկ Ուդումյանը «շտապում է» շնորհակալություն հայտնել ընտանիքին, հարազատ մարդկանց, ընկերներին և, իհարկե, Աստծուն: «Շնորհակալություն ծնողներիս, որ ինձ դաստիարակել են ինքնուրույն և ոչ կաղապարված մտածելակերպով»,- esyes.am-ին ասաց Արևիկը:

Երգիչ Արմոն հաճախ է շնորհակալություն հայտնում, երբեմն՝ «մերսի», «ապրես» բառերով: Այսօր նա շնորհակալ է բոլորին, որովհետև նրանցից յուրաքանչյուրը հաստատ ինչ-որ լավ բան արած կլինի մյուսի համար: