Միջկառավարական հանձնաժողովների՝ 2013թ. աշխատանքների հետ կապված հարցեր

ՀՀ փոխվարչապետ, հայ-իրաքյան, հայ-քուվեյթյան, Հայաստան-ԱՄԷ միջկառավարական համագործակցության հանձնաժողովների հայկական կողմի համանախագահ Արմեն Գեւորգյանի մոտ այսօր տեղի ունեցած խորհրդակցությանն ամփոփվեցին նշված հանձնաժողովների 2012թ. աշխատանքները եւ քննարկվեցին ընթացիկ տարվա անելիքները: Այս մասին հայտնում են ՀՀ ՏԿՆ հասարակայնության հետ կապերի բաժնից:

Արձանագրվեց, որ 2012թ. Բաղդադում տեղի ունեցավ Տնտեսական համագործակցության հարցերով հայ-իրաքյան միջկառավարական համատեղ հանձնաժողովի առաջին նիստը, որի արդյունքում ձեռք բերվեցին մի շարք ոլորտներում գործակցության վերաբերյալ պայմանավորվածություններ: ՀՀ էկոնոմիկայի նախարարության ներկայացուցիչները տեղեկություններ ներկայացրին հայ-իրաքյան առեւտրատնտեսական հարաբերությունների ակտիվացման ուղղությամբ կատարվող աշխատանքների մասին: Հանձնաժողովի երկրորդ նիստը նախատեսվում է անցկացնել այս տարի՝ Երեւանում:

Այս տարի Քուվեյթում նախատեսվում է նաեւ Տնտեսական եւ տեխնիկական համագործակցության հայ-քուվեյթյան միջկառավարական հանձնաժողովի երկրորդ նիստը: Առաջինը տեղի էր ունեցել 2011թ-ին Երեւանում: Աշխատանքներ կիրականացվեն նաեւ Հայաստան-ԱՄԷ միջկառավարական հանձնաժողովի առաջին լիագումար նիստի անցկացման ուղղությամբ:

Ա. Գեւորգյանը հանձնարարեց հանձնաժողովներում ընդգրկված պետական մարմինների ներկայացուցիչներին առաջարկություններ ներկայացնել հանձնաժողովների նիստերի օրակարգերի վերաբերյալ: Առանձնահատուկ կարեւորվեց գործընկեր երկրներում անցկացվող միջազգային առեւտրատնտեսական եւ արդյունաբերական ցուցահանդեսներին հայաստանյան գործարար շրջանակների ներկյացուցիչների մասնակցությունը, ինչը նպաստելու է փոխգործակցության նոր հնարավորությունների ստեղծմանը:

Անդրադարձ եղավ նաեւ Հայաստան-ԱՄԷ երկրորդ գործարար համաժողովը 2013թ-ին կազմակերպելու հնարավորությանը: Փոխվարչապետը ՀՀ արտաքին գործերի եւ էկոնոմիկայի նախարարությունների ներկայացուցիչներին առաջարկեց միջոցառման կազմակերպման ուղղությամբ աշխատել էմիրաթական կողմի հետ՝ հաշվի առնելով նաեւ 2010թ. Երեւանում անցկացված առաջին համաժողովի փորձը: