«ՀԺ». Ոստիկանները կարո՞ղ էին փրկել սպանվածի կյանքը

«ՀԺ»-ն թերթի հունվարի 10-ի համարում տեղեկացրել էր, որ նախորդ օրը Երևանի «Դալմայի այգիներ» այգեգործական ընկերության տարածքում հայտնաբերված մասնատված դիակի վերաբերյալ ՀՀ ոստիկանության տարածած հաղորդագրության մեջ փաստերը խեղաթյուրված են: Հաղորդագրության մեջ ասվում էր, որ «ձեռնարկված օպերատիվ-հետախուզական գործողությունների արդյունքում» է հայտնաբերվել դին, այնինչ իրականում, ինչպես թերթի թղթակցին հայտնել են սպանվածի հարազատները, նրա հայրն է գտել դին և զանգահարել ոստիկանություն: Եթե ոստիկանությունը մատնացույց արված վայրում ծառերի թփերը ետ տանելն ու հողի տակ տոպրակով փաթաթված դիակը գտնելը համարում է օպերատիվ-հետախուզական գործողությունների արդյունքում դիակ հայտնաբերել, ապա խոսք չունենք ասելու: Պարզվում է, սակայն, որ դա իսկապես այդպես է: Հակառակ դեպքում, թերթի հրապարակումից հետո, ոստիկանապետ Վովա Գասպարյանի հրահանգով ոստիկանության Մալաթիայի բաժնում, որի աշխատակիցներն էլ աչքի էին ընկել նման բարձր մակարդակի մասնագիտական գործունեությամբ, ծառայողական քննություն կսկսվեր: Հատկապես որ, սպանվածի հարազատները պնդել էին նաև, որ նրա տանից դուրս գալու և չվերադառնալու հաջորդ օրը ահազանգել էին ոստիկանության Մալաթիայի բաժին, հետաքննիչներին էլ հորդորել էին ստուգել հատկապես այն մարդու տնակը, որի բակում օրեր անց հայտնաբերվեց դին: Մինչդեռ նրանց հորդորները օդում կախված են մնացել, ոստիկանները մատը մատին չեն տվել մինչև որ հայրն անձամբ է գնացել և հայտնաբերել որդու դին:

Հարց է առաջանում՝ հնարավո՞ր է չէ, որ սպանությունը տեղի ունեցած չլիներ անհետացման օրը, և եթե ոստիկանությունն օպերատիվ կերպով հասներ դեպքի վայր, կարող է և փրկեր մարդու կյանքը: Անկախ ամեն ինչից, իրականություն է դա, թե ոչ, ոստիկանությունը պարտավոր էր շարժվել հենց այդ կանխավարկածով: Վստահ եմ, մեր ոստիկանների կանխավարկածն այլ է եղել. «Դե, նոր Տարի ա, երևի մարդը մի տեղ խմած, քնած ա, հո չենք ընկնի ման գանք...» (սպանվածը տանից դուրս է եկել և չի վերադարձել հունվարի 3-ին): Ու հնարավոր է, որ այդ օրը հենց խմած-քնած եղած են եղել ինչպես սպանվողն, այնպես էլ՝ սպանողը, որի պահակատնակը, ինչպես թերթի թղթակցի հետ զրույցում նշել են հարևանները, հավաքատեղի է հանդիսացել «բաժակի ընկերների» համար: Եթե ոստիկանությունը ժամանակին տեղ հասներ, կարող է և դեռ արթնացած չլինեին, ու կորածը ողջ և առողջ հայտնաբերվեր: Համենայնդեպս, այս վարկածը գոյության իրավունք հաստատ ունի: Սակայն, այդ ամենը չի արվել ու դեռ ցինիկաբար հաղորդագրություն է տարածվել, թե «օպերատիվ-հետախուզական գործողությունների արդյունքում» դին հայտնաբերվել է:

Հանրությունը դեռ չի մոռացել, որ նույնքան «օպերատիվ» ոստիկանության Արաբկիրի բաժնի աշխատակիցները ամիսներ առաջ արձագանքեցին հարևանների ահազանգներին և դեպքի վայր ժամանելուց հետո հայտնաբերեցին խեղդամահ արված ուսուցչուհու դին: Այս դեպքի հետ կապված իհարկե, ծառայողական քննություն անցկացվեց, որի արդյունքներով բնականաբար, պարզվեց, որ ուսուցչուհու մահվան մեջ Արաբկիրի բաժնի աշխատակիցների մեղավորությունը չկա, մահը վրա է հասել ավելի շուտ, քան նրանք կարող էին արձագանքել: Չեմ կասկածում, որ մասնատված դիակի գործով նույնպես ծառայողական քննությունը նման մի բան կպարզի: Օրինակ՝ սպանողը, որ արդեն ձերբակալված է, ցուցմունք կտա, որ ինքը հունվարի երեքին հանդիպումից վայրկյաններ անց է կատարել իր ոճրագործությունը, այնպես, որ ոստիկաններն այդտեղ մեղք չունեն: Ի դեպ, այս գործով «ծառայողական քննություն սկսելու և իրենց աշխատանքներում թերացած ՀՀ ոստիկանության Մալաթիայի բաժնի համապատասխան աշխատակիցներին պատասխանատվության ենթարկելու վերաբերյալ» երեկ միջնորդություն ներկայացրեց Գլխավոր դատախազությունը: Այս լուրը հայտնի դաոնալուց հետո, ոստիկանությունը հերթական անգամ պաշտոնական մակարդակով խեղաթյուրեց փաստերը, հայտարարելով, թե մինչ դատախազության միջնորդությունը, նախորդ օրը ոստիկանապետի ցուցումով այս գործով ծառայողական քննություն արդեն սկսված է եղել: Նախորդ օրը թերթի թղթակիցը կոնկրետ հարց էր ուղղել ոստիկանությանը՝ արդյոք սկսվե՞լ է ծառայողական քննություն, թե ոչ և ստացել էր կոնկրետ պատասխան՝ այս գործով միայն քրեական գործ է հարուցված՝ սպանության փաստով: Բայց դե, հասկանում եք, որ հետին թվով ոստիկանապետի ցուցում և ծառայողական քննություն սկսելու որոշում կազմակերպելը, ընդամենը տեխնիկայի հարց է: