Վալդայում Պուտինը կանի աղմկոտ հայտարարություն, որը կքննարկվի ամբողջ աշխարհում․ վերլուծաբան

Վերլուծաբան Հակոբ Բադալյանն իր տելեգրամյան ալիքում գրում է.

«Պեսկովը հայտարարել է, որ վաղը Վալդայում Պուտինը կանի աղմկոտ հայտարարություն, որը կքննարկվի ամբողջ աշխարհում: Պեսկովն, իհարկե, հնարավոր է պարզապես չափազանցնում է՝ «մարկետինգային» տրամաբանությունից ելնելով, թեև նա այդ իմաստով կարծես աչքի չի ընկնում նման վարքագծային դրսևորումներով: Հետևաբար, հավանականությունը, որ Պուտինը կանի իսկապես նշանային ինչ-որ հայտարարություններ, բավականին մեծ է, եթե Պեսկովն այդ առնչությամբ անում է անոնս:

Ի դեպ, ես օրինակ չէի բացառի, որ նախորդ գրառմանս թեման՝ կապված վաշինգտոնյան համաձայնությունների առնչությամբ Մոսկվայի ու Երևանի հասցեին ադրբեջանական «մատնագրի» հետ, կարող է պայմանավորված լինել նաև նույն պուտինյան հնարավոր ելույթի հետ կապված սպասումներով կամ որոշակի իրազեկվածությամբ: Սա իհարկե պարզապես իմիջայլոց, պարզապես չբացառելու տրամաբանությամբ:

Իհարկե սա չի նշանակում, որ պուտինյան հնարավոր աղմկոտ հայտարարությունների թեման վերաբերելու է հայ-ադրբեջանական պրոցեսին: Անշուշտ, թեման կներառի գլոբալ հարցերը: Բայց, անկասկած է, որ հայ-ադրբեջանական պրոցեսը այդ հարցերի հանդեպ գտնվում է անմիջական ազդեցության տիրույթում»: