Ադրբեջանի հերթական ձախողված ապատեղեկատվությունը

Տեղի է ունեցել ադրբեջանական ևս մեկ ապատեղեկատվության փորձ, որը պարզաբանվել է  Հայաստանի ԱԳ նախարարության կողմից: Այսպես՝ երեկ ադրբեջանական լրատվամիջոցները «տեղեկություն» էին տարածել, թե իբր Լիտվայի խորհդարանի Եվրոպական ակումբի և տեղեկատվական գրասենյակի կողմից հունվարի 10-ին կազմակերպած քննարկման ժամանակ, պատասխանելով Լիտվայում Ադրբեջանի դեսպանի հարցին, Վրաստանի ԱԳ նախարար Մայա Փանջիկիձեն ասել է, որ Ղարաբաղյան հակամարտությունը պիտի լուծում գտնի միմիայն Ադրբեջանի տարածքային ամբողջականության սահմաններում։

Սույն հարցի վերաբերյալ Հայաստանի արտաքին գործերի նախարարությունը հարցում է կատարել Վրաստանի արտաքին գործերի նախարարությունից` խնդրելով պարզաբանել, արդյոք նմանատիպ հայտարարություն եղել է։ Վրաստանի ԱԳՆ-ից պատասխանել են, որ քննարկման ընթացքում Վրաստանի արտգործանախարարը, պատասխանելով հարցին, նշել է, որ Վրաստանը հարգում է Ադրբեջանի տարածքային ամբողջականությունը, բայց դա որևէ կերպ չի կապել Լեռնային Ղարաբաղի հետ և որևէ կերպ չի հիշատակել Լեռնային Ղարաբաղը ՝ չնայած Ադրբեջանի դեսպանի համառ պնդումներին կապել այդ երկու հարցերը։

Ավելին, Վրաստանի ԱԳՆ-ն Հայաստանի իր գործընկերոջն է տրամադրել այդ հանդիպման տեսագրության հղումը, որտեղ ամեն ինչ պարզ երևում է։ Ավելին, տեսագրությունից պարզ է դառնում, որ, պատասխանելով Լիտվայում Հայաստանի դեսպան Արա Այվազյանի հարցին, Վրաստանի ԱԳ նախարարն ընգծել է, որ յուրաքանչյուր հակամարտություն յուրահատուկ է և ունի իր լուծման ճանապարհը։