Չեխիայի մշակույթի նախարարը մարտին կայցելի Հայաստան

Հունվարի 11-ին ՀՀ մշակույթի նախարար Հասմիկ Պողոսյանը հանդիպել է ՀՀ-ում Չեխիայի Հանրապետության ժամանակավոր հավատարմատար Պետր Միլենսկուն: Շնորհավորելով Հայաստանում Չեխիայի Հանրապետության դեսպանության բացման կապակցությամբ՝ նախարարը հույս է հայտնել, որ 2010 թ. ստորագրված «Հայաստանի Հանրապետության կառավարության և Չեխիայի Հանրապետության կառավարության միջև մշակույթի, կրթության, գիտության, երիտասարդության և սպորտի բնագավառներում համագործակցության մասին» hամաձայնագրի շրջանակում կակտիվանան հայ-չեխական մշակութային կապերը:

Կողմերը քննարկել են 2013 թ. մարտ ամսին Չեխիայի Հանրապետության մշակույթի նախարար Ալենա Հանակովայի Հայաստան կատարելիք այցի մանրամասները: Հանդիպման ընթացքում պայմանավորվածություն է ձեռք բերվել մինչ Չեխիայի Հանրապետության մշակույթի նախարարի այցը «ՀՀ մշակույթի նախարարության և Չեխիայի Հանրապետության մշակույթի նախարարության միջև 2013 – 2015 թթ մշակութային համագործակցության մասին» գործնական ծրագրի դրույթների հստակեցման վերաբերյալ: Հասմիկ Պողոսյանն իր զրույցում, անդրադառնալով Հայ գրատպության 500-ամյակի և Երևանը 2012 թ. գրքի համաշխարհային մայրաքաղաք ծրագրերի շրջանակներում 2012 թ. արտերկրում իրականացված մշակութային միջոցառումներին՝ մասնավորապես Եվրոպայի հայ գրատպության կենտրոններում և խոշորագույն թանգարաններում ու գրադարաններում իրականացված հայ հնատիպ գրքի ցուցահանդեսներին, առաջարկել է Չեխիայում ևս նմանօրինակ միջոցառում կազմակերպել: ՀՀ մշակույթի նախարարը չեխական կողմին հրավիրել է մասնակցելու Հայաստանում կազմակերպվող միջազգային գրական նախագծերին՝ հատկապես կարևորելով «Գրական տապան»-ը և «Թարգմանիչների և հրատարակիչների միջազգային համաժողովը», ինչպես նաև պատրաստակամություն հայտնել իրականացնելու գրական-թարգմանական համատեղ ծրագրեր: Նախարարը փաստել է, որ Հայաստանը մշտապես մասնակցել է Չեխիայում կազմակերպվող «Լիդիցե» գեղանկարչության մանկական միջազգային մրցույթ-ցուցահանդեսին և արժանացել մրցանակների: