Հնդկական ֆիլմերի շաբաթ Հայաստանում՝ հունվարի 15-ից

Հունվարի 11–ին ՀՀ մշակույթի նախարար Հասմիկ Պողոսյանն ընդունել է ՀՀ-ում Հնդկաստանի Հանրապետության գործերի ժամանակավոր հավատարմատար Պանկաջ Սաքսենային:

Ողջունելով հյուրին, նախարարը նշել է, որ հայ-հնդկական մշակութային հարաբերությունները գտնվում են կայուն զարգացման փուլում և համոզմունք հայտնել, որ հետագա համագործակցությունը կունենա իր արժանի շարունակությունը:

Զրույցի ընթացքում նախարարն անդրադարձել է Հայաստանում իրականացված համատեղ մշակութային ծրագրերին, մասնավորապես՝ 2012 թ. ՀՀ մշակույթի նախարարության աջակցությամբ հնդկական «Ռամայանա» էպոսի հայերեն թարգմանությանը և սեպտեմբեր-հոկտեմբեր ամիսներին «Հնդկական մշակույթի օրեր» ծրագրի շրջանակում՝ հնդկական համույթի ներկայացումներին:

Այնուհետև, կողմերն անդրադարձել են 2013 թ. Հայաստանում իրականացվող համատեղ մշակութային ձեռնարկներին, որի համատեքստում Հնդկաստանի Հանրապետության գործերի ժամանակավոր հավատարմատարը տեղեկացրել է նախարար Հ. Պողոսյանին, որ հունվարի 15-19-ը «Մոսկվա» կինոթատրոնում կանցկացվի «Հնդկական ֆիլմերի շաբաթ Հայաստանում» ծրագիրը, որի շրջանակում կցուցադրվեն հնդկական բազմաժանր ֆիլմեր /ռուսերեն լեզվով/:

Հանդիպման վերջում Պանկաջ Սաքսենան շնորհակալություն է հայտնել նախարար Հ. Պողոսյանին ջերմ ընդունելության, ինչպես նաև երկու երկրների միջև ձևավորված մշակութային հարաբերությունները պատշաճ մակարդակի վրա պահելու համար: