Վրաստանում բողոքի ալիք՝ տեղական ընտրություններից հետո

Վրաստանի մայրաքաղաք Թբիլիսիում տեղական ինքնակառավարման ընտրությունների ֆոնին սկսվել են զանգվածային բողոքի ցույցեր, հայտնում է Ambebi պորտալը։

Ցույցերը հիմնականում կենտրոնացած են Ռուսթավելի պողոտայում, ամբողջությամբ փակվել է Ազատության հրապարակը։ Բողոքավորները հավաքվել են խորհրդարանի շենքի մոտ, ինչպես նաև փակել են երթևեկությունը Մելիքիշվիլիի պողոտայում՝ բարձրացնելով Վրաստանի պետական դրոշներ և ցուցադրելով պաստառներ՝ «Երբ անարդարությունը դառնում է օրենք, դիմադրությունը դառնում է պարտականություն» կարգախոսով։

Ցուցարարները իշխանություններին մեղադրում են Ռուսաստանի հետ սերտ կապերի մեջ և պահանջում նոր խորհրդարանական ընտրություններ։ Ավելի վաղ հաղորդվել էր, որ բողոքի ակցիաներին միանալու համար տարբեր շրջաններից հարյուրավոր ավտոմեքենաներ շարասյուներով շարժվել էին դեպի Թբիլիսի, իսկ իշխանությունները սկսել էին ուժային կառույցների մոբիլիզացիա։