ԵՄ-ն արձագանքել է Վրաստանում տեղական ընտրությունների օրը տեղի ունեցած իրադարձություններին

Եվրոպական միության (ԵՄ) ընդլայնման հարցերով հանձնակատար Մարտա Կոսը արձագանքել է Վրաստանում տեղական ինքնակառավարման մարմինների ընտրությունների օրը տեղի ունեցած իրադարձություններին։

«Այս շաբաթ օրը Վրաստանում անցկացվել են տեղական ինքնակառավարման մարմինների ընտրություններ՝ այլախոհության դեմ լայնածավալ բռնաճնշումների ֆոնին։ Անկախ մամուլի դեմ ամիսներ տևած գործողությունները, քաղաքացիական հասարակության դեմ ուղղված օրենսդրական նախաձեռնությունները, ընդդիմադիրների և ակտիվիստների ազատազրկումը, ինչպես նաև ընտրական օրենսգրքի փոփոխությունները՝ ի նպաստ իշխող կուսակցության, զգալիորեն սահմանափակել են մրցակցային ընտրությունների հնարավորությունը։ Ընդդիմության մեծ մասը բոյկոտել է ընտրությունները, և մասնակցության մակարդակը եղել է համեմատաբար ցածր։

Բացի այդ, Վրաստանի իշխանությունների կողմից միջազգային դիտորդներին՝ մասնավորապես ԵԱՀԿ/ԺՀՄԻԳ-ին, ժամանակին չհրավիրելը խաթարել է ընտրական գործընթացի թափանցիկությունը և խոչընդոտել վստահելի միջազգային դիտարկումը։ Տեղական կազմակերպությունները  հրաժարվել են դիտարկում իրականացնել՝ ռեպրեսիվ մթնոլորտի պատճառով։ Մեծ թվով քաղաքացիներ շարունակաբար բողոքել են իշխող «Վրացական երազանք» կուսակցության ճնշող քաղաքականության դեմ։ Մենք կոչ ենք անում ազատ արձակել բոլոր կամայականորեն ձերբակալված անձանց։ Մենք կոչ ենք անում պահպանել հանգստություն ու զսպվածություն ընտրություններից հետո և հորդորում ենք իշխանություններին հարգել քաղաքացիների հավաքների և արտահայտվելու ազատության իրավունքները։

Բոլոր քաղաքական ուժերի և քաղաքացիական հասարակության մասնակցությամբ կառուցողական և համապարփակ երկխոսությունը կարևոր նշանակություն ունի, և մենք կոչ ենք անում բոլոր կողմերին զերծ մնալ բռնությունից։ Վերջապես, Եվրոպական միությունը վճռականորեն մերժում և դատապարտում է Վրաստանում ԵՄ-ի դերի վերաբերյալ տարածվող ապատեղեկատվությունը, ինչպես նաև ԵՄ դեսպանի դեմ ուղղված անձնական հարձակումները», — հայտարարել է Մարտա Կոսը։