Ո՞ւմ են հասցեագրված Սոնա Շահգելդյանի սիրային գրառումները

Արսեն Հայրապետյանի հետ զուգերգից հետո խոսակցություններ սկսվեցին, թե երգչուհի Սոնա Շահգելդյանի սիրային թեմայով ֆեյսբուքյան գրառումներն ուղղված են հենց Արսենին: Բացի այդ՝ նրանք հաճախ էին տարբեր միջոցառումների ներկայանում երկուսով ու բավականին ջերմ էին:

-Վերջին շրջանում Ձեր գրառումներում հաճախ եք անդրադառնում սիրո թեմային ու սիրո խոստովանություններ գրում: Ո՞ւմ են դրանք ուղղված, ո՞վ է Ձեր երկրորդ կեսը, որին նաև տեսահոլովակ էիք նվիրել:

-Արսենի հետ կապված միանգամից ասեմ, որ մենք մտերիմներ ենք ու մեր մեջ սիրավեպ չկա: Աշխատում ենք ակումբում: Արսենը հրաշալի մարդ է, լավ երգիչ: Այդքանը: Ինչ վերաբերում է երկրորդ կեսին, ապա ես նրան վաղուց եմ գտել, իմ մեջ եմ պահում ու դեռ չեմ ուզում բացահայտել: Չգիտեմ՝ ինչ կլինի ապագայում… Ուզում եմ, որ ինձ սիրեն ու չօգտվեն միայն իմ բարությունից: Ամուսնության մասին դեռ չեմ մտածում. վաղ է:

-Սոնա, վերջին օրերին համացանցում ակտիվ քննարկվում է ՓՈՓ-հանրագիտարանի մրցանակաբաշխությունը, որտեղ Ձեր տեսահոլովակն արժանացավ «Ամենավատ կլիպ» մրցանակին: Դրան հաջորդեցին ֆեյսբուքյան Ձեր գրառումները, որտեղ վրդովված քննադատում էիք այն: Ինչո՞ւ չներկայացաք մրցանակը ստանալու:

- Ես ներկա չեմ եղել այդ միջոցառմանը, մրցանակն էլ հաստատ չէի վերցնի: Երկրորդ՝ ես գիտեմ, որ իրենց ասելով չէ՝ տեսահոլովակս լավն է, թե վատը: Իմ անունը շոշափում են, որ իրենց PR-ն անեն: Իրենց արևին փոփ-հանրագիտարան մրցույթ են անում ու մրցանակներ տալիս: Ամեն մեկը թող իրեն նայի ու չփնովի մյուսին: 5 հոգով կամ ծանոթ, բարեկամով չի որոշվում. երգի լավ, վատ լինելը ժողովուրդն է որոշում: Իսկ որ կան մարդիկ, որ գործ չանելով մրցանակ են ստանում, դա նորություն չէ:

Նյութը՝ mamul.am-ի: