Նախատեսվում է լուծարել ՆԳՆ «Տեխնիկական անվտանգության ազգային կենտրոն» ՊՈԱԿ-ը (տեսանյութ)

ՆԳ նախարարի տեղակալ Արմեն Մկրտչյանը հոկտեմբերի 3-ին հանդիպել է արտադրական վտանգավոր օբյեկտների տեխնիկական անվտանգության փորձաքննություն իրականացնող մասնավոր կազմակերպությունների ներկայացուցիչներին։ Մասնակցել են նաև ՆԳ նախարարության պատասխանատու ստորաբաժանումների ներկայացուցիչներ։

Ինչպես հայտնել է ՆԳՆ-ն, քննարկման նպատակը ոլորտում առկա խնդիրների, առաջարկվող օրենսդրական փոփոխությունների, հնարավոր բացերի և շահագրգիռ կողմերի տեսակետների ուսումնասիրությունն էր։ Ներկա օրենսդրական կարգավորումներով՝ Հայաստանում արտադրական վտանգավոր օբյեկտների տեխնիկական անվտանգության փորձաքննությունը համարվում է հավատարմագրման ենթակա գործունեություն։

Փորձաքննություն իրականացնելու իրավունք ունեն ՆԳ նախարարության «Տեխնիկական անվտանգության ազգային կենտրոն» ՊՈԱԿ-ը և Էկոնոմիկայի նախարարության «Հավատարմագրման ազգային կենտրոն» ՊՈԱԿ-ի կողմից հավատարմագրված իրավաբանական անձինք կամ անհատ ձեռնարկատերեր։

Գործող մոդելն ունի մի շարք բացեր, որոնց մասով քաղաքականության մշակման, ստանդարտների սահմանման և դրանց վերահսկողության տեսանկյունից հատվածային լուծումներ են նախատեսվել։ Խնդրի լուծման և համակարգի բարելավման նպատակով ՆԳ նախարարությունը մշակել է ոլորտային ռազմավարություն, որը հանրային քննարկման է ներկայացվել e-draft.am հարթակում։ Առաջարկվում է անցում կատարել լիցենզավորման համակարգի, որի շրջանակում գործընթացի ղեկավարումը կվերապահվի ՆԳ նախարարությանը։

Նախատեսվում է նաև լուծարել ՆԳ նախարարության ենթակայության տակ գործող «Տեխնիկական անվտանգության ազգային կենտրոն» ՊՈԱԿ-ը՝ գործընթացը դարձնելով ավելի թափանցիկ և մրցակցային։

Քննարկվել են նաև լիցենզավորման մոդելի առավելությունները, վերահսկողական մեխանիզմների կատարելագործման հնարավորությունները, մասնավոր հատվածի ներգրավվածության սահմանները և շահերի բախման ռիսկերը։

Մասնավոր կազմակերպությունների ներկայացուցիչները դրական են գնահատել նախաձեռնությունը՝ պատրաստակամություն հայտնելով մասնակցել բարեփոխումների գործընթացին և առաջարկել լուծումներ։ Համատեղ լուծումներ և գործողությունների ճանապարհային քարտեզ մշակելու նպատակով ՆԳ նախարարության և մասնավոր հատվածի ներկայացուցիչների հետ նմանօրինակ քննարկումները շարունակական են: