Արեգակի մերձակայքում հայտնաբերվել է աստղերից հնագույնը

Աստղագետները մինչ այժմ անգերազանցելի ճշգրտությամբ որոշել են HD 140283 աստղի տարիքը, որը, ինչպես պարզվել է, հայտնիներից հնագույնն է: Այս հայտնագործության մասին Ամերիկյան աստղագիտական ընկերության գիտաժողովին զեկուցել է Փենսիլվանիայի համալսարանի աշխատակից Հովարդ Բոնդը: Աշխատանքի համառոտ բովանդակությունը ներկայացնում է NatureNews-ը:

Աստղի տարիքը հնարավոր է եղել պարզել Երկրագնդից հեռավորության ճշգրիտ չափման շնորհիվ: Գիտնականները «Հաբլ» դիտակով անց են կացրել 11 առանձին դիտում և որոշել, որ աստղը գտնվում է 186 լուսատարի հեռավորության վրա:

Ապա գիտնականներն չափել են աստղի լուսատվությունը: Աստղերի կյանքի վերջին փուլում, երբ դրանց ընդերքում ավարտվում է միջուկային վառելիքը, լուսատվությունը թույլ է տալիս միարժեքորեն գնահատել երկնային մարմնի տարիքը: Տվյալ աստղի դեպքում այն ստացվել է 13.2 միլիարդ տարի, իսկ չափման սխալը կազմել է ± 700 միլիոն տարի, ինչն այս աստղը դասում է մեզ հայտնի աստղերից հնագույնը՝ համեմատելի Տիեզերքի բուն տարիքի հետ (13.77 միլիարդ տարի):

Չնայած նման ռեկորդային տարիքին, աստղը պատկանում է երկնային լուսատուների ոչ թե առաջին, այլ երկրորդ սերնդին: Բանն այն է, որ այն պարունակում է ոչ մեծ քանակի այնպիսի ծանր էլեմենտներ, որոնք առհասարակ չեն հանդիպում առաջին սերնդի աստղերում:

Երկրորդ սերդնի նման ծեր աստղի հայտնաբերումը գիտնականներին թույլ է տվել եզրակացնել, որ լուսատուների առաջին և երկրորդ սերունդների միջը ընկած ժամանակահատվածն այնքան էլ մեծ չի եղել, ինչպես կարծում էին մինչ այդ: Հնարավոր է, որ այն կազմել է ընդամենը մի քանի տասնյակ միլիոն տարի, ինչը տիեզերական մասշտաբներով ընդամենը մի ակնթարթ է: