Առողջապահության համակարգի համար պատմական փուլում ենք. Ավանեսյան

Առողջապահության նախարար Անահիտ Ավանեսյանի նախաձեռնությամբ կայացավ հանդիպում կլինիկական օրդինատորների հետ։ Այս մասին տեղեկացնում են ՀՀ առողջապահության նախարարությունից:

 

«Առողջապահության համակարգի համար պատմական փուլում ենք, և շնորհավորում եմ ձեզ, որ դուք եք այն առաջին օրդինատորները, որոնք կունենան անհատական անցումային լիցենզիա՝ գործելու իրավական դաշտում, միջազգային չափորոշիչներին համահունչ լիցենզիայով»,- ողջունելով հանդիպմանը եկած ուսանողներին՝ նշել է առողջապահության նախարարը։

 

Անահիտ Ավանեսյանն ընդգծել է այս բարեփոխման գործընթացը օրդինատորների հետ հնարավորինս սահուն անցնելու անհրաժեշտությունը՝ կարևորելով խնդիրների ժամանակին վերհանումն ու նրանց դիտարկումները։ Հենց այս նպատակով էր հրավիրված հանդիպումը, որը հնարավորություն է տվել գործընկերների հետ միասին մի քանի ժամ մանրակրկիտ պատասխանել անհատական լիցենզիայի հետ կապված հարցերին ու լսել նրանց մտահոգությունները։