Ձեզանից սովորեցինք և Դուք օրինակ դարձաք մեզ համար, թե ինչպես պետք է սիրել հայրենիքն ու եկեղեցին. Տեր Զարեհը՝ Մկրտիչ Սրբազանին

Մասյացոտնի թեմի Դալարի սուրբ Աստվածածին եկեղեցու հոգևոր հովիվ Տեր Զարեհ քահանա Աշուրյանը խոսք է հղել Արագածոտնի թեմի առաջնորդ Մկրտիչ Սրբազանին, որին իշխանությունները երկու ամսով կալանավորել են։

«Գիտեմ, որ Ձեր համեստությունից հաղթված թույլ չէիք տար, որ գրեի, բայց չեմ կարող լուռ հետևել այս տեսակ ապօրինություններին, որոնք տեղի են ունենում Ձերդ Սրբազնության և Ձեր Տիրախնամ թեմի շատ նախանձախնդիր Քահանա Եղբայրներիս հանդեպ։

Պատիվ եմ համարում, որ 2016 թ.-ին` Ղևոնդեանց քահանայից տոնի օրը, Մայր Աթոռ Սուրբ Էջմիածնում իմ 12 քահանա եղբայրների հետ միասին հենց Ձերդ Սրբազնության ձեռամբ և օրհնությամբ ընդունեցի քահանայական Սուրբ Օծությունը և Ձեռնադրությունը։ Մեծագույն ուրախություն է, որ հենց Դուք եք իմ հոգևոր ծնողն, ում տեսչության ժամանակ առաջին անգամ ոտք դրեցի Սևանի Վազգենյան հոգևոր դպրանոց և շատ ուսանողներ, որոնք այսօր հոգևորականներ են և իրենց ծառայությունն են բերում Հայ Առաքելական Սուրբ Եկեղեցու տարբեր թեմերում, Ձերդ Սրբազնության հայրական հոգատար հայացքի ներքո են ձևավորվել և դաստիարակվել որպես եկեղեցականներ։

Ձեզանից սովորեցինք և Դուք օրինակ դարձաք մեզ համար, թե ինչպես պետք է սիրել հայրենիքը, եկեղեցին, ընկերը, ինչպիսի արժանապատվության կրող պետք է լինի Քրիստոնյա Հայ Տղամարդը և առհասարակ։

Վստահ եմ՝ սա ևս կանցնի և շատերը կանցնեն, բայց Ձեր տեսակը կմնա որպես օրինակ շատերիս համար։

Որդիական խոնարհությամբ և աղոթքներով Զարեհ քհն. Աշուրյան»,- գրել է Տեր Զարեհը։