Վահագն Չախալյանն ազատ կարձակվի համաներմամբ. Շիրակ Թորոսյան

Տարածված տեղեկատվությունները, թե Ջավախահայ քաղբանտարկյալ Վահագն Չախալյանն արդեն իսկ պետք է ազատված լիներ՝ ապատեղեկատվություն է: Այս մասին Lurer.com-ի հետ զրույցում ասաց «Ջավախք» հայրենակցական միության նախագահ, ՀՀ ԱԺ պատգամավոր Շիրակ Թորոսյանը:

«Վահագն Չախալյանն ընդգրկված չէր քաղբանտարկյալների ցանկում, Վահագն Չախալյանը ազատվելու է համաներումով: Վրացական նոր իշխանությունները որոշել են նրան ներում շնորհել համաներման սկզբունքով, ոչ թե՝ որպես քաղբանտարկյալ: Քանի որ նա ընդգրկված չէր քաղբանտարկյալների ցանկում, տեղեկություններ տարածվեցին, թե նրան բաց չեն թողնելու. իրականում առաջին երկու-երեք շաբաթվա ընթացքում որոշակի պրոցեդուրաներ կան, որից հետո նա ազատ կարձակվի»:

Շիրակ Թորոսյանի խոսքով, իրեն հասած իմֆորմացիան վրացական աղբյուրներից է, որոնք ժամանակին հայտարարել են այդ մասին. «Նման տեղեկատվություններն առաջացան այն պատճառով, որ նրա անունը քաղբանտարկյալների ցանկում չէր: Դա էլ վրացական իշխանություններն են որոշել. նրան ազատ արձակել որպես քաղբանտարյա՞լ, թե՞ համաներմամբ,- ասաց Շիրակ Թորոսյանը և հավելեց,- վրացական աղբյուրների տարածած տեղեկության համաձայն նախնական գործընթացները կարող են տևել ամենաշատը մեկ ամիս:

Հիշեցնենք, որ Ջավախահայ քաղաքական գործիչ Վահանգն Չախալյանը 2009թ. ապրիլի 7-ին դատապարտվել է 10 տարվա ազատազրկման Ախալցիխեի առաջին ատյանի դատարանում: Չախալյանը դատապարտվել է զանգվածային միջոցառումների կազմակերպման, հասարակական կարգը խախտելու, իշխանության ներկայացուցչի հանդեպ խուլիգանության, զենքի եւ զինամթերքի ձեռք բերման ու պահման համար: 5000 լարի եւ 2000 լարի (համապատասխանաբար) տուգանքների դատապարտվեցին Վահագն Չախալյանի հայրն ու կրտսեր եղբայրը: