Լանա Խաչատրյանն ու «Maroon 5»-ի վոկալիստ Ադամ Լիվայնը ժպիտներով են փոխանակվել

Հասարակություն 15 Հունվար, 2013 4:22

Լանա Խաչատրյանը Սուրբ Ծնունդն ու Նոր տարին նշել է Միացյալ Նահանգներում: Երգչուհին առաջին անգամ է եղել օվկիանոսից այն կողմ, BRAVO.am-ի հետ զրույցում էլ անկեղծացել է, որ մեծ ոգեւորությամբ չի մեկնել, սակայն տպավորված է վերադարձել Երեւան:

Նա միայնակ մեկնել է այնտեղ բնակվող հորեղբոր ընտանիքի մոտ, եղել Լոս Անջելեսում եւ Լաս Վեգասում. «Ամերիկան միշտ այն վերջին վայրն է եղել, որտեղ կցանկանայի ապրել. չէի սպասում, որ այդքան տպավորված կվերադառնամ: «Merry Christmas»-ի ժամանակահատվածում ողջ երկրում բարի ու լուսավոր մթնոլորտ էր, ոչ մի տեղ չէի հիացել ու այդքան չէի սիրել Սուրբ Ծնունդը:)»,-պատմել է երգչուհին եւ հավելել հետեւյալը. «Շատ մարդիկ զարմացած հարցնում էին՝ արդյոք վերադառնալու եմ, ես էլ վստահ ասում էի՝ այո: Չեմ ցանկանում ապրել ոչ միայն Ամերիկայում, այլեւ ընդհանրապես Հայաստանից դուրս»:

23-ամյա երգչուհու համար տպավորիչ է եղել նաեւ ամերիկյան «The Voice» հեռուստաշոուի եզրափակիչ համերգներից մեկին ներկա լինելը.«Հայկական տարբերակին դեռ չեմ հետեւել, չեմ փորձի համեմատել, քանի որ օբյեկտիվ չի լինի: Ժյուրիի անդամներ Քրիստինա Ագիլերայի, «Maroon 5» խմբի վոկալիստ Ադամ Լիվայնի, «Cee Lo»-ի ու մյուս աստղերի վերաբերմունքն ամենակարեւորն էր: Ադամի հետ մոտ էինք նստած, ժպիտներով էինք փոխանակվում:): Ես միշտ զարմանում եմ, թե ինչպես մեր հայ երգիչները, ապրելով Հայաստանի նման փոքր երկրում, կարող են իրենց վերաբերմունքը փոխել իրենց իսկ երկրպագուների նկատմամբ: Իսկապես կայացած աստղերը պարզ ու հասարակ են իրենց պահում, այդպիսին են, չեն ձեւացնում: Յուրաքանչյուր երգիչ իր հանդիսատեսով կա, պետք է գնահատել այդ սերը»:

Լանայի խոսքով՝ ամերիկյան նախագծին մասնակցելու ցանկություն այնքան էլ չունի, քանի որ չի ուզում երկար ժամանակով հեռանալ Հայաստանից ու իր ընտանիքից. «Եղբայրս այնտեղ կինեմատոգրաֆիայի ոլորտում է սովորում, նրա համար շատ հետաքրքիր էր, անընդհատ ուզում էր իմ տվյալներով հայտ ներկայացնել, բայց թույլ չէի տալիս, քանի որ այնտեղ աշխատելու իրավունք պետք է ունենաս, պայմանագիր կնքես ու երկար ժամանակով մնաս: Իսկ ես հնարավորություն չունեմ իմ սիրելի բոլոր մարդկանց Հայաստանից ինձ հետ տանել ու այնտեղ երկար ժամանակով ապրել»:

Լանան նշել է, որ Լաս Վեգասում խաղատուն էլ է գնացել, բայց կնախընտրեր դրա փոխարեն քայլել ու հիանալ տեսարժան վայրերով. «Ինձ հետ եկած բոլոր մարդիկ խաղում էին, իսկ իմ սիրտը կանգնում էր, որ այդ րոպեներին շատ ավելի կարեւոր բաներ եմ բաց թողնում: Մի կերպ ստիպեցին, որ խաղամ: Ինձ գրավեց միայն այն, որ կարող էի Սելին Դիոնի շոուի տոմս շահել, բայց չհաղթեցի. ես այս հարցում շատ անհետաքրքիր եմ:)»:

Նա շնորհակալ է իր հարազատներին երկիրը գեղեցիկ ներկայացնելու համար.«Նահանգների մասին իմ կարծիքը փոխվել է իմ ընկերների ու բարեկամների շնորհիվ, որոնք ինձ ամեն ինչ ներկայացրել են գեղեցիկ ձեւով, հետաքրքիր վայրեր են տարել, հնարավորության սահմանում թույլ չեն տվել, որ տեսնեմ այն վատ երեւույթները, որոնց միջով անցել են Ամերիկա տեղափոխված բոլոր հայերը»:

Երկրորդ անգամ ԱՄՆ մեկնելու դեպքում Լանան նորից կգնա Դիսնեյլենդ, նաեւ շատ է հավանել Լոս Անջելեսի «Getty» թանգարանը. «Կուզեի մեր թանգարաններում էլ մարդկանց այդպիսի հոսք տեսնել, կարեւորը երեխաներին փոքր տարիքից տանեն շփվելու արվեստի հետ: Իսկ Դիսնեյլենդ գնացել եմ հիանալի մի զույգի հետ, առաջին րոպեից սիրել եմ այդ բարի մթնոլորտը: Շատ ցավալի է, որ հայ երեխաները չեն կարող տեսնել ու վայելել մանկական այդ հրաշալի աշխարհը»:

Վերադարձից հետո Լանա Խաչատրյանը պատրաստվում է նոր երգեր ձայնագրել, ունի համագործակցության նոր առաջարկներ, որոնք կներկայացնի առաջիկայում. «Այնտեղ առաջին իսկ օրվանից շատ ակտիվ հանգստի մեջ էի, հիմա դրական էներգիայով լիցքավորված վերադարձել եմ»: